Read Angami Naga Pethakeshüu 12 Bible Online

Pethakeshüu 12 - Angami Naga bible

Pethakeshüu 12

¹Nie khriesarüü baluokecü nu nie pelhoukeshüu rükralie, teisozha kesuoko vorkecü mhodzü, tsiu teicieko penuo vorkecü mhodzü, nie-e sie, “A süko nu mha a kenei ba mo” iketa mhodzü;

²niaki mu kezie, tsiu khrü, mu themvüko zeibouitakecü mhodzü, tsiu kimhouko teirü sie lata[18] kemo nu,

³teisozha sünhie kikepfhemia perüsatatuo, tsiu kekuomia nuketsutatuo, tsiu mhageyakezhapfüko themia tsaketa la rüleitatuo, tsiu khirki nu mha mehokezhamia mhangu merütatuo,

⁴Tsiu chaü nu kikhako khawatuo, mhakege pfhe tsaketa ki, tsiu miapuoe pera pfhe ze di sietatuo, tsiu tsali kechüpfüko chü kerünuokewa ki;

⁵Mha kerükrie rei preiketa ki, tsiu kemichie thuo cha nu dita ro, mu nhasibo pou partuo, mu ku u pelhatatuo, tsiu u kemenguu chülie motatuo; kekreilamonyü themiae kechachie kiu nu la votatuo, tsiu thekrü chüyakezhako chaüko nu rühou tuoketa ki,

⁶rakachü rhü phreikeshü mhodzü, morei suna khou bietshakewa mhodzü morei dzükhou nu lipfhüu biephrokewa mhodzü, morei puothuo-u puo bou nunu biephakewa mhodzü, n pelhoukeshüu rükraliecie.

⁷Thiedzü tuoi nyopheu kijü ki la votatuo, tsiu thesü[19] Ukepenuopfü ki la votatuo.

⁸Mha kemethuo sie rei kemethuo zo; Pethakeshüu[20] sidi puya; mha peteko kemethuo zo.

⁹Sizomoü, Pethakeshüu[21] mhasikecü rübei monyü, Puoe tsierei mhakesikele pie themia pethaya, uwe, puoe mhaleshü sidi pfhüse parlie, di mhasidie kekra pfhü kesiesoshüte.

¹⁰Pethakeshüue[22] die u keneiko pfhüshü tsiu thupiekezhüko mezhü zo, süko ketho dieko zo.

¹¹Mhakesimia die-e kethie mhie, tsiu kehou nu kepethamiae gojal pie zhie kesakeshü kemhie, süu tekuokepfhemia puo kinu khakeshü dieko thu kenguliete.

¹²A nuo, mha hako mho rei menuoliecie, leshü kekra chükeshü puo thela tuo mo; tsiu leshü phrüthor rei uchü umo mezietaya.

¹³Mha thelau pete rünyüliete; Ukepenuopfü preilie, tsiu puo diekhakeshüko chüüzelie, hau themia chü morokesuo mhatho peteu zo.

¹⁴Kekreilamonyü Ukepenuopfü mhatho pete, kepekhre nu vie pete, mha kevi shierei kesuo rei se dienya kecükecü ki vortuo.