Read Angami Naga Pethakeshüu 2 Bible Online

Pethakeshüu 2 - Angami Naga bible

Pethakeshüu 2

¹A a thuo a rüchü di sie, “Tsie vorlie, a u neikecüko methashütuo, nie thuo nie keneiu chülie” si. Derei harie, hau rei kemethuo zo.

²Ae sie kenyü üse, “Süu kenya zo” mu u keneiu üse, “Süu se kedipuo chülie ga?” sishü.

³A a nou nu kedipuo mhie di zu pie a chü a mo bu ketheguoliete shikecü pfhüsie, sikecü ki mhasi bu a nou ta zetuo; tsiu themia nuo bu puo kerhei ki teikhro kedipuo chü ro vituo shicü ngutuoü di kenya mhatho rei chütuoü sie zo.

⁴A mhatho kezhakechako chü, a a la kiko chü, tsiu khubelie cielie;

⁵A tezie tsiu nhasi zie chülie; tsiu süko nu nhasibo puo rhi kekreikreicüko pete pelhoushülie.

⁶A a la rüzieko hielie, ketsa nu seibo memiekezhüko petseketuo la.

⁷A a la kituo thenu rei thepfu rei khrülie, a kinu nu penuokelie kituo rei nyi; siro Jerusalem nu a mhodzü ketuo pete kirei ae khunuo kecükezha kro kekra nyi.

⁸A a la rakachü mu suna tsiu kedimia kinyi mu rünako kengulie; ae ü kechü thepfumia rei thenumia rei tsiu uchü umo menguko siro a pelipfümia kekra rei nyi.

⁹Süla ae Jerusalem nu a mhodzü ketuo pete kirei zha mu vikuo; süsie a mhasi rei a zetuo.

¹⁰A mhi-e kedipuo puo nei shi, a süko khawa mo, a a nei a nyü kechü nunu a nou kerei seta mo, kekreilamonyü a noue a mhatho peteko nunu puo neilie. Mu süu a mhatho zhakhrau zo.

¹¹Sidi a a dzie pie chükelie peteko tsiu a mhachükelie mhathoko mehoshü; mu harie, mha peteko kemethuo zo, tsiu teikhrie whuoketuo mhie zo,[6] siro niakiu khro mha puo kemevi ba mo.

¹²Süla ae mhasi, kenya, tsiu kemelo mehotuoü sie, kekreilamonyü kedi-ue sie vorkezhü la kedipuo chülie vi ga? Thiedzü chükewau zotie.

¹³Sitse ae kezie-e kezei ki vikuokecü tuoi, mhasi-e meciekemo ki vikuokecü ngulie.

¹⁴Mhakesimia mhi puo tsü nu tuoya; derei mhasikemomia kezei nu tuoya. Sirei a sikelie mhapuoe peteko gei vorya.

¹⁵Sitse a thuo a rüchü di sie, “Mhasikemomia gei kevor-u a gei rei vor zotuo; di siro kiüdi a bu mhasi sete shi?” siya. Tsiu a thuo a rüchü keba hauha rei kemethuota zo.

¹⁶Kekreilamonyü mhasikemo-u kirei mhakesiu rükra sei zocü chüya mo; süusü kenguko rhi nunu sikelie, vorketuo teiko nu mha peteko rükra mota zotuokecü la. Mhakesimia kimhie di rataya shi, mhasikemomia mhie di zo!

¹⁷Süla a kelhou ngu mecüta zo, kekreilamonyü teikhro mhathomhachü pete a la re zo; mha pete rei kemethuo zo tsiu teikhrie whuoketuo mhie zocü la.

¹⁸A niaki khro mhachüketuo a mhathoko pete ngumecüta zo, kekreilamonyü a süko khapie zhü a sie kevormia tsüwatuo.

¹⁹Mu sükoe mhakesimia puo tuo mo mhasikemomiatuo shi supuo silie ta? Sirei ukoe a mhachüpie kezhü peteko, tsiu niaki khro a mhasi sekecü pete kekhatuo. Hau rei kemethuo zo.

²⁰Siro teikhroe mha kechü pete kemerü jü zokecü la a a nou khapie u cha meziekecü nu shüwa.

²¹Kekreilamonyü mia puoe mhasi, kesikele mu thedo kevi se mha chüshü; di süu khapie sümhie di mha chükemomia puo tsüwaya. Hau rei kemethuo tsiu mha kesuo se puo zo.

²²Themia niaki khro mhakechü pete nu mu thenounyü di mha kechüko nu kedipuo ngulieya ga?

²³Kekreilamonyü teisozha pete nu thenoukesuo, tsiu puo mhathoe puo keyhukezhie zo; theva gei rei puo noue rüleilieya mo. Haha rei kemethuo zo.

²⁴Themiae mhacümhakrie tsiu puo mhathomhachü nu puo neikelie ki mha kevi puo rei jü. Hau Kepenuopfü dzie nunu vorkecü a ngushü;

²⁵kekreilamonyü puo sa mo di supuonie mhacümhakrielie morei puo neilie vi ga?

²⁶Kepenuopfüe puo neimia gei mhasi, kesikele, tsiu thenoukenei khashü tsüya derei kephoumamia la we puoe kengulie tsiu pfhepie zhü di se Kepenuopfü mhodzünu themia keviu tsüwaya. Hau rei kemethuo zo tsiu teikhrie whuoketuo mhie zo.[7]