Read Angami Naga Pethakeshüu 3 Bible Online

Pethakeshüu 3 - Angami Naga bible

Pethakeshüu 3

¹Mha pete rei puo thuo puotei puo nyi, tsiu teikhro mhakehoupuo rei puotei puo nyi.

²Kepenuo tei puo, tsiu kesia tei puo, mha seketuo tei puo, tsiu sekeshüu phe laketuo tei puo;

³dukhriketuo tei puo, chü kemeneketuo tei puo; mha bierhuoketuo tei puo, tsiu chüse sierketuo tei puo;

⁴kraketuo tei puo, tsiu nyüketuo tei puo; thekrü chüketuo tei puo, tsiu nashüketuo tei puo;

⁵ketsie kelhouketuo tei puo, tsiu ketsie pa kenguketuo tei puo; huoniehuo ciepielieketuo tei puo, tsiu huoniehuo ciepie lhoü u kethetaketuo tei puo;

⁶pfhüketuo tei puo, tsiu pejüwaketuo tei puo; se baketuo tei puo, tsiu kelhouwaketuo tei puo.

⁷cierhaketuo tei puo; tsiu terhüketuo tei puo; kemekrie baketuo tei puo, tsiu diepuketuo tei puo;

⁸huoniehuo khrieketuo tei puo, tsiu ngumecüketuo tei puo; terhü chüketuo tei puo, tsiu vitho chüketuo tei puo.

⁹Mhachümhalieyakezhau puo mhathomhachü nunu kedipuo kemevi ngulie ga?

¹⁰Ae Kepenuopfü themia nuonuo bu se mereinu di khakeshü mhatho-u nguwate.

¹¹Puoe puo thuo puo tei ki mha peteko chü kezivi phishü; mu puoe voketa mu vorketuoko dze khapie themia melou nu shüwate, sirei themiae Kepenuopfü mhachükeshüko therie nunu vo thela ketso mhatho pfhüse parlie kenjü zo.

¹²themia puo kerhei ki puo nei mu puo noumvü tuokelieu ki mha kevi jükecü a si.

¹³süsie rei themia bu mhacümhakrie tsiu puo mhatho pete se puo neilie zhü, süue Kepenuopfü mhaphruo zo.

¹⁴Kepenuopfü mhachükeshü kehoupuorei ba seilieya; mhapuorei pie süu ba salie kenjü, morei süu nunu mhapuorei chü setalie kenjü; Kepenuopfü thuo hau chüshü, themia bu puo khrü preilieketuo la chükeshü zo.

¹⁵Thiedzü ketuou sü tsiedo ketuou zo; vorketuou sü vorketau zo; mu Ukepenuopfüe voketau pfhüse parya.[8]

¹⁶Sizomoü a niaki khro kethoca sou nu kerüzhüu ba, tsiu kemiatho-u sou nu mha kesuo baketa ngu.

¹⁷A thuo a nou nu sie, Ukepenuopfüe kemiathomia tsiu kerüzhümia dienya kecütuo, kekreilamonyü puoe mhakehoupuo la rei tsiu mhatho pete la puo tei rhie phreshü.

¹⁸A a thuo a nou nu themia nuonuo dze le di sie, Ukepenuopfü bu uko dojü di ukoe khunuo zoükecü thashü uko kie ba zo.

¹⁹Kekreilamonyü themia gei voryakezhau khunuo gei rei vorya; mia puo siaketa mhie di kekreiu rei siataya; uko pete u keha kemhie zo, tsiu themiae khunuo ki meyiekuo mo zo; kekreilamonyü mha pete rei kemethuo zo.

²⁰Peteko thechü puo nu voya; pete nyophe nunu vor, tsiu pete nyophe mevi phre latatuo.

²¹Supuonie themia ruopfüe pekhra vota tsiu khunuo ruopfüe pesu kijü tsuyakecü si ba ga?

²²Süla ae sikelie mia puoe puo mhatho nu puo nei keba ki mha kevi jü, süue puo yau zocü la; supuonie puo sietsa kedipuo vortuo shikecü se vor puo pekieshülie vi ga?