Read Angami Naga Pethakeshüu 5 Bible Online

Pethakeshüu 5 - Angami Naga bible

Pethakeshüu 5

¹No Kepenuopfü ki vokecü ki n phi cha menuolie, penuo vo di rünyükelie-e mhalekemoko ruosuo khakeshü ki vikuo; kekreilamonyü ukoe mha kesuo chü molie siya mo.

²Diepu rükri hie, mu Kepenuopfü mhodzü mhaputuoü rükrita hie; Kepenuopfüe teigei bacü la, mu no we kijü ba, süla n die bu tsaliecie.

³Kekreilamonyü merei kekra geinu u mho pemaya; tsiu mhalekemomia pfhe-e die kekra geinu silieya.

⁴No Kepenuopfü ki mhapuo phrakeshü ki, süu chü menuota hiecie; puoe mhalekemomia ngu puo neiya mocü la. No phrakeshüu chüwacie.

⁵No phrashü di chü moketau ki no phrashü mokecüu vikuo zocü la.

⁶N tie bu n chüpie phoumawa hie; tsiu no dielieu mhodzü, süu kekrüte; isi hiecie; kiüdi Kepenuopfü bu n pfhe n die la puo nei mo di n dzie mhatho pekawatuo ga?

⁷Kekreilamonyü u mho kekra kebara kemethuo baya, mu die rei krataya; derei no we Ukepenuopfü preilie.

⁸Mhanüu no rüna puo nu kejümia pese tsiu kethoca mu kemezhüu bie pejükewa ngu zo ürei, süu la n ngo hiecie, rükriekuokecüue kezhakerükrieu meho bayacü la, tsiu süu rükriekuokecü puo uko mho ba.

⁹Derei mha pete leshü ro hau kijüu la mha kevi puo zo, lie puo mho, kedimia puo bu bakecü.

¹⁰Raka puo neiyakezhamia raka se puo kelhuo chülie lho; morei kinyi ngu krakelie u neiyakezhamia kinyi se u kelhuo chülie lho; hauha rei kemethuo zo.

¹¹Mha ngu krakelie ki, süko cüükriekecü rei krataya; niepumia puo mhi pie süko mehokecü sietsa puo kemevi kedipuo ba ga?

¹²Mhachüyakezhamia huoyo morei kekra cüükrie shierei zetshüilieya derei kenyimia mha kekra kebau puo chüpie puo bu zelie lhotaya.

¹³Niaki khro a mha kesuo se puo ngu; süusü kenyimiae kinyi khapie kebau thuo u pechüya.

¹⁴Derei kinyi süko mhatho chü khrieliekemo geinu jütaya, mu puoe nuo puo penuolie zorei, mha puo rei puo dzie nu ba motaya.

¹⁵Puoe puo zuo va nunu kevor tuoi, puo latatuo. Puoe methuo di vor, mu puo dzie nunu puo mhachükelie puo rei se puo medzilie lho.

¹⁶Hau rei mha kesuo se puo zo, puo kimhie di vor shi, sütuoi puoe latatuo; puo mhachümhalie pie teikhrie tsükewa kemevi kedipuo ba ga?

¹⁷Tsiu teisozha pete puoe kezei nunu mhacümhakrieya, tsiu nousuo, kechükenyü mu nouyie puo gei ba phi.

¹⁸Harie, a ngukecü, Ukepenuopfüe kha puo ketsü, niakiu khro nu teisozha pete mhacümhakrie tsiu puo mhatho pete nu puo neikelie, haha vi mu puo mese tou zo; kekreilamonyü hau puo ya zo.

¹⁹Themia kehoupuorei Ukepenuopfü kha puo ketsü kinyi, mhanyaürako tsiu se puo neilie kevi kekuo, tsiu puo bu puo ya ngukelie mu puo mhatho nu puo neikelie ha Ukepenuopfü mhaphruo zo.

²⁰Puoe puo kelhou nu teisozhako rükra philie lhocü la, kekreilamonyü Ukepenuopfüe kenei pie puo tshuwate.