Read Angami Naga Pethakeshüu 9 Bible Online

Pethakeshüu 9 - Angami Naga bible

Pethakeshüu 9

¹Mha hako pete a nou nu medo di thapie pekieshütuoü sie, süusü kemiathomia tsiu mhakesimia, mu uko mhathoko Ukepenuopfü dzie nu ba zocü, süusü kekhrie shierei morei ngukemecü rei miapuorei süu si mo. Mha sünie mhodzünu keba pete,

²kemethuo zo,[16] kekreilamonyü pete gei süu voya, kemiathomia gei rei, tsiu kerüzhüu; kevimia tsiu kesuomia, kemesamia tsiu mesakemomia, ruosuo kechüu, tsiu ruosuo chü kemo-u gei voya, themia keviu mhie, kephouma rei kemhie zo; mu rüsekecümia gei rei rüse preikecümia rei kemhie zo.

³Mha puoe pete gei voryakecü hau niaki khro mha chüyakezha peteko donu mha kesuo puo, süsie rei themia meloue mha kesuo thuo tshupfü tuo zo, tsiu uko kerhei kirei kenya thuo u melou nu tuo, mu süsie uko tuo kesia ki votaya.

⁴Derei kerheimia pete zetuoketamia la we kemerü baluo; kekreilamonyü tefü rhei kebaue losha siaketau ki vikuo zo.

⁵Kekreilamonyü kerheimiae uko siaketuo si baya; derei kesiamiae mhapuorei siya mo, tsiu uko zhakhra rei ba mo; derei uko rükra motaya.

⁶Siro uko kekhrie tsiu ngumecükecü, tsiu mia ngu u rokecü jüte, mu niaki khro mhathomhachü kehoupuorei kechachie uko ya tuo mote.

⁷Volie, n nei di n niekhrüda cülie, tsiu n nou mvü di n zu krielie; kekreilamonyü Ukepenuopfüe thiedzüthonu n mhatho lieliete.

⁸N pfhenei bu krapoui sei balie; tsiu n tsü gei tier bu jüta hie.

⁹Niakiu khro n kelhou teisozha kemethuoko nu puoe khapie n ketsü n kimia no puo khrieyakezhapfü ze n neilie, kekreilamonyü kelhou hau nu, tsiu no niakiu khro mhachümhaliekecü nu süu n ya zo.

¹⁰N dzie-e mhakehoupuorei chüketuo ngulie ro, süu n kekuo üse chüliecie, kekreilamonyü no vokezhü Sheol nu, mhatho morei mharhükecü morei kesikele morei mhasi ba mo.

¹¹Ae ngukecü niakiu khro takewhuokecü kemephrümia vie morei terhüe kekuomia vie, morei kecükekrie-e mhakesimia la morei kinyi-e kemereimia la, morei u neikecüe mhachükesimia la imo; derei puoteiu mu chülie keviu uko pete gei vor phreya.

¹²Miapuorei kepeka vorketuo tei pulie kenjü. Khuoe u zhokesuo jal nunu bolieyakezha tuoi, mu pera ciephrie nunu malieyakezha tuoi, themia rei ketsopfhü u gei mhai vorketuo tei siya mo.

¹³Niakiu khro mha thakie hau rei ae ngu, mu süu a mhodzü ki mha kezha puo.

¹⁴Thiedzü rüna kecüyo puo ba, tsiu sünu themia huoyo ba; tsiu kedi kezha puo sier süu petsou di süu houlie, sidi kegeituoü dahou kezha pfhepie süu houlie,

¹⁵Derei sünu mhakejü mhakesimia puo ngulie, mu puo mhasi se rünau kelashü. Sizoürei miapuorei mhakejü süu rükra mota.

¹⁶Derei ae sie, “Mhasi-e kekuo ki vikuo, derei kejümia mhasi we rütseta tsiu puo dieko we rükra motaya”.

¹⁷Mhasikemomia donu melie kemerie chü kebau kirei, mhakesimia die kemekrie di pukeshüe rünyü zhükuo.

¹⁸Mhasi-e terhünyieko kirei vikuo, derei kephoumamia mha kevi kekra pekawaya.