Read Angami Naga Solomon Üzo 4 Bible Online

Solomon Üzo 4 - Angami Naga bible

Solomon Üzo 4

¹Harie, no zivilie, a khriepfü, harie no zivilie, a khriepfü! N ziekeya khro n mhi-e mekhru tuoi zo. N thae Gilid kijüthou gei temvü kro-u keker tuoi zo.

²N hue tekuo umie bewaketa kropuo dzürüluwa di kepar tuoi; süko pete-e nuobi penuoshüya; tsiu süko donu nuojü puorei jü.

³N tie-e kelo meriemegekecüpfü tuoi, tsiu n me ngu u nei, n dzoe n ziekeya khronu turaü tuoi zo.

⁴Noe David kuda pfhe pie puo cha kechü mhie; sügei nyienyiekecü terhü miavimia la pezhü goupie kezha tuoi.

⁵N nue chüzhie nuobi tuoi, terhuobiepou donu nha cüketha tuoi.

⁶Teiso pipar di mhakhrü lata kemochie, a mür kijüthou gei votuo tsiu mharekethengu kijükhru gei votuo.

⁷No ha zivi tseilie, a khriepfü; n gei kethevie yopuo rei tuo mo zo.

⁸Lebanon nunu a ze vortacie, a kimia, Lebanon nunu a ze vortacie. Amana mezü geinu, Senir mu Hermon mezü geinu, losha bou nunu, khurhü kijüthouko geinu tuotacie.

⁹No a nou chü pemvüshüte, a üpfü, a kimia, n mhi pie mehoshü kevi nunu, n vo nu cü si yopuo se di.

¹⁰N kekhrie-e kide zivi shi, a üpfü, a kimia! N kekhrie-e khubezu kirei kide vi shi, tsiu n tier re kethengue mharekethengu pete kirei vikuo zo!

¹¹Harie a kimia, n tie-e mepfhidzü tuoi potata ba; n meü khro mepfhidzü tsiu mithunudzü baya; siro n pfhenei re-e Lebanon re tuoi zo.

¹²Tezie ca khapie kebau sü a üpfü zo, a kimia, tezie ca khapie keba, dzüluoki mekawaketa mhie zo.

¹³N seibokoe nhasi zie nu turaübo, nhasi u keneipfü, hena sa di nard rei ba.

¹⁴Nard mu safron, kalamus, mu seichü rekevi seibo doneiü pete, mür mu aloe, puore kevi pete.

¹⁵Tezie nu dzüluo, kerhei dzükhou, siro Lebanon nu kerüko.

¹⁶Harie, Pesotsa teikhrieu, sieliecie; vorliecie, pekhrotsa teikhrieu! A tezie nu rükhrieshücie, sidi puo rekethenguu bu kru parliecie. A khrieu bu puo zie nu vorliecie, sidi nhasi u keneiko cüliecie.