Read Angami Naga Solomon Üzo 8 Bible Online

Solomon Üzo 8 - Angami Naga bible

Solomon Üzo 8

¹He-i no ha bu a siezeu mhiecü we, a zuo nudzü nu kecüu ücü we! A chazou nu n ngulie ro, a n meboshütuo, tsiu miapuorei a rütsetalie lho.

²A n chatha ze a zuo kinu vortuo, mu puo a meziepfükelie kibouu nu. A n bu turaüdzü puo rekethengu krietuo.

³He-i puo dzie puo vitsa a tsü khro, tsiu puo dzie puo zatsa a ciepielietuo.

⁴A n ki pu beiya, harie Jerusalem nuopfüko, kekhrieu kebvü morei puo kesouwa hie, puo bu dojülie kemochie!

⁵Rayha nunu parkezhü puo khrieu gei vakhrie pfüketuou supuo ga? Ciephobo-u khronu a n pecoshü, sünunu n zuoe n se sier, sünu n penuokeshüpfü n se siershü.

⁶A pie n melou nu zasi vükelie mhiekecü, n dzieco nu zasi vükelie mhieliecie; kekhrie-e kuopie kesia mhie zocü la; kemengukecüe repie mekhru kemhie zo; sü ketue mi mitu zo, puo miü re se.

⁷Dzü kekra se tshü rei kekhrie tshüwalie kenjü, morei dzüdi rei süu zoupfütalie kenjü. Mhanuü mia puoe puonya puora pete pie kekhrie khrütuoü rei, süu tseiütso mothorta zotuo.

⁸Hieko üpfü kecüyo puo ba, mu puoe puo nu pou moluo. Puo dze pukepar nhie hieko hie üpfü la kedipuo chütie shi?

⁹Mhanuü hapfüe sozha puo ücü we, hieko puo geinu rakachü kediki kevi puo chülietuo; derei mhanuü puoe kikha puo ücüwe hieko sedar la pie puo khalietuo.

¹⁰Ae sozha puo, siro a nue dahou kerükrie tuoi, sitse ae puo mhiki noune se kevormia puo tuoi.

¹¹Solomon-e Bal-hamon nu khubelie puo ba; puoe khubelieu pie kepfhemia penyiewa; süko mia puo puoe süko si la rakachü nyienyiekecü pfhükelie mese.

¹²A khubelie, a viekecüu, a mhodzüki ba; he-i Solomon-e, nyie puo bacü mese, mu puosi kepfhemia krie kenie bacü mese.

¹³He-i noe tezieko nu lhou baya, a zekoe n pfhe rünyü baya; a bu sü rünyüshücie.

¹⁴Kenourheiliecie, a khrieu, mu no thelou morei tekhra nuonuo kijüthou re kevi gei ketuo tuoiliecie!