Read Angami Naga Isaya 1 Bible Online

Isaya 1 - Angami Naga bible

Isaya 1

¹Amoz nuou Isaya Juda kedi Uzia, Jotham, Ahaz mu Hezekia teiki Juda mu Jerusalem dze ngukecü.

²He-i teiko, rünyüshü, mu n nyie kedeishücie, he-i kijüu; Jihova pushüte: A nhicuko theke di uko sesiershü, derei uko a perhiepetsoute.

³Thudo we puo keperiu siya, mu gada zorei puo niepuu mhacabouu siya, derei Israel we si tuo mote, a themiako we mhacamhala si tuo mote.

⁴Ce! kephouma seyie, kejokemou pie u pie chüpfüketuo themiako, kesuokechü tsiaüyie, kesuo chüyakezha nuonuo, Jihova khawaketako, Israel Kemesau rütseyakezhako, mhapuorei kepfhesi tuo moketako!

⁵Nieko kiüdi nie vü sakecü pfhü saya ga? Nieko kiüdi dieze nu lhou mvü ba zomu? U tsü pete kekrü bate, mu u melou pete meziete.

⁶U phizhü nunu kho u tsü ketso, puotoukecü puorei tuo mote, derei vü kerümvü mu kechüpfü mu theziekepfü rüzapfü zote, süko ne reiwa mo, morei pha rei shü mo, morei tier pie va kemene rei mo.

⁷Nie rüna ruo zhüte, nie nadiko mi bu thewate; nie mhingu kinu solhimia bu nie kijü mezuliezhie; chazoumia bu vawa mu ruo zhüte.

⁸Siro Zion nuopfü bu khubelie nu pruyo puo tuoite, tsütuo lie nu pru puo tuoi; mia bu puo rekeba rüna puo tuoi.

⁹Krodiko Jihovae huoyo lhiepie u tsü motuoücü we, úko ha Sodom mhie zotuo, mu Gomora mhieta zotuo.

¹⁰Jihova die rünyüliecie, nie Sodom mhokezhako! Ukepenuopfü u kepethadie rünyüliecie, nie Gomora nu themiako!

¹¹Nie ruothoruoriko chü phikeshüko a la kedipuoümu? Jihovae siya. Ae tekuo chü mu puophou kevi khunuo shuo, mu kethe ruosuo ngu a nyiete; thudo zie, morei tekuonuo zie, morei temvü zie rei a neiya mo.

¹²Nie a mhodzünu kevor ki,[1] supuonie nie dzie nu hau cha mu? A kitiezha kede sa motalie;

¹³ruosuo se kevor kemethuo zo; mharekethengu a la kerütse. Khrülhou mu Sabat mu kiekeshü kehou mu kejokemou kenyi kehouko a hie salie kenjüte.

¹⁴A ruopfüe nie khrülhouko mu nie nyiko rütseya; süko a la thepie puo chüte, a süko toupfü a nyiete.

¹⁵Niekoe nie dzie yhakeshü ki, nie kinu a mhi kevietatuo; nieko kecha chü phi zo shierei, a rünyü lho; nieko dzie sü thezie thuo tshu.

¹⁶Nie khrüwaliecie; nie chü kemesalie; nie mhatho kesuoko a mhingu kinu setalie; kesuo chü sa hie,

¹⁷mha kevi kechü dojülie; kethocau pfhülie, mia u peseyakezhako kelashülie, merünuomia yapielie, samipfüko zhapulie.

¹⁸Jihova puya: Vorlie di úko keze mharhü kekie khe, nie kephoumako thuo merieyhara zorei, süko kra pie pekrie mhietatuo; ukoe merie pie meriekrü zorei, tekuomie mhielietuo.

¹⁹Nie chünyüsiei mu dieze chükeba sie, nie kijü keviu cüükrietuo;

²⁰derei nie mvü mu mia petsou ro, zhiechau bu nie mezulietuo; Jihova tie thuo pushüte ru.

²¹Kimhie di kemiatho nadiu thethenumiapfü puo chüta mu! Hapfüe kethoca pie puo tshupfü zo muru! kemiatho puo gei tuoya ru, derei tsie we kedukhrimia thuo tshute!

²²N rakachü puolhe puokha chüte, n khubezu dzü pie reite.

²³N kedinuoko mia kepetsoumiate mu kerügumia ze khrietho chüte. Mia pete theso u neite mu mha u ketsüko whuoya. Ukoe merünuomia yapieya mo, mu samipfüko yau u mhodzüki tuo mo.

²⁴Süla Kekuotho-u, Krodiko Jihova, Israelko Kekuou hakemhie puya: He-i, a a ngumvüko gei a noupfhü rushütuo, di a perhiekecüko gei a kheputuo!

²⁵A a dziepie nie gei shütuo; sidi migedzü pie thezhübuo the pezhawayakezha tuoi n kerhu pete bie pejüwatuo.

²⁶Kerieki mhiei a n capimia kha lashütuo, sede ki mhiei mharhükesiko kha lashütuo. Süze kenuotsa n üse kemiatho nadiu, kedietho nadiu üdi kietuo.

²⁷Kemiatho se Zion rhalietuo, mu kemiatho pie puo ze keba, thenou kedikelieko rhalietuo.

²⁸Derei mia kepetsouko mu kephoumako peka kesawatuo, mu Jihova rükra moketako bie pejüwatuo.

²⁹Nie phriebo nie nei kezhako la mengatatuo; mu nie kedakelieko tezie la nie ziekejü chütuo.

³⁰Nie phriebo puonyü rüwitayakezhapfü tuoituo; mu dzü kejü tezie puo tuoitatuokecü la.

³¹Kekuomia teisedo mhietatuo, mu uko mhathoe[2] mi kepro mhietatuo, sidi uko mu uko mhatho keze tutatuo, miapuorei unie pemhekewa jü di.