Read Angami Naga Isaya 10 Bible Online

Isaya 10 - Angami Naga bible

Isaya 10

¹He-i ketoukemo zho rhükeshüko, mia neketekecü zho thukeshüko,

²kethocau nunu ketsopfhüko kelhiketuo la, mu kejümiako mezhüu pejüketuo la, mu samipfüko pie nie mhava chüketuo la, mu merünuoko pie nie chüte chü tuoketuo la!

³Siazha khakeshü teisozha nhie, kepecie nunu kepeka se vorketuo nhie no kedipuo chülie ta? N kekhruohi la supuo pfhü, n kinyi pie kirapuo batuo ga?

⁴Sütuoi kedieko donu gou tuota moketuo la, mu dukhrikewako ze tetsuta moketuo la. Hai shierei puo nouyieu rüdita mo; puo dzie yhapie ba zo.

⁵Ce chülietie, Asiria, a nouyie seiro-u, uko dzienu seitau sü a noukerüpeu!

⁶Pelekemo seyieu petsouketuo la a puo ketseshü, mu a noupfhü pfü keba themiako petsou di a puo ki die khashü, mhava mu pekaketuo, mu cha nu nyoba tuoi uko kedewaketuo la.

⁷Derei puo lekecü hau mo, mu puo noue sükemhie medo mo; derei mha pekaketuo-ue puo nou ba, mu huoyo mo di seyie kekra dathewatuoükecüu.

⁸Kekreilamonyü puoe sie: “Kediko pete a rüpfhünuo mho kezhamia mo me?

⁹Kalno-e Karkemish mhie zo mo me? Hamath-e Arpad mhie zo mo me? Samariae Damaska mhie zo mo me?

¹⁰A dzie-e vo terhuorhi kedibako tsokecü tuoi, uko miarhiko Jerusalem mu Samaria nu miarhiko ki zhakuo.

¹¹A Samaria mu puo terhuorhiko gei chükeshüu Jerusalem mu puo mharhiko gei rei chüshü motuo me?”

¹²Niepuue Zion Kijüthou gei mu Jerusalem gei puo mhatho-u chü tseiwa tse, puoe kemholiekeba mu kemharhükecü Asiria kediu petseishütuo.

¹³Kekreilamonyü puoe sie: “A dzie kekuou mu a mhasi pie süu chülie, ae kesikele bakecü la; ae themia kijü rieko biewate, mu uko kinyi vawate; thudo mhie ae kediba gei kebako sekerwate.

¹⁴A dzie perakru keli tuoi, themiako kinyi liliete; mu mia peradzü vawaketako chü kengulieyakecü tuoi ae kijü pete kenguliete, mu mhapuorei shüphra rei mo, morei tiega rei mo, morei mecu rei mo” si.

¹⁵Seidurüe puo kepieu ki kemelhalie vi me? Morei seigeizhie-e puo keseu mhodzü puo thuo puo chü pezhatuo me? Seiroe puo seketuou yhase sie, morei kethe puoe sei kemo-u piesietuo me?

¹⁶Süla Kediu, krodiko Jihovae puo terhümiaviko gei weto votayakecü kechü kere puo ketseshütuo, mu puo zapuzayieu khro mhaketu puo petushütuo, mi ketu tuoikecü puo.

¹⁷Israelko kezie mi puo chütatuo, mu puo Kemesau miü puo chütatuo; sidi süu tu di khunhievachü puohuko mu huphienuoko mezulietuo

¹⁸Puo ketsa kevi mu puo kijü keviu, puo ruopfü mu puo mo rei Jihovae pekawatuo, mu süue mha suota di khakewa vie mhie votatuo.

¹⁹Puo tsa mu lhiepie keba seiboko tsatsa vo nhicumiayo puo thuo rei phrüpie thulie vitatuo.

²⁰Sünhie Israel lhiekelieko mu Jakob kinumia rheikebako puo vükeshüu gei vakhrie motatuo, derei thetho nunu Jihova, Israel Kemesau gei vakhrielietuo.

²¹Lhiekelieko, Jakob lhiekelieko kekuou Ukepenuopfü ki la vortuo.

²²Nie themia Israel-e dzükezha theshünyo mhie shierei, lhiekeshü huoyo rübei la vortuo. Kemezhü pie ketshukezie chü di kepeka vorketuo pushüwate.

²³Jihova, Krodiko Kepenuopfü peka tseiwatuoü di pushüwaketau, kijü pete nu chüshütuo.

²⁴Süko Jihova, krodi Kepenuopfüe hakemhie puya: He-i, a themia, Zion nu kebako, Asiriako, Ijiptmia tuoi di seiro pie nieko vü mu kethe yha siekecü ki uko prei hiecie.

²⁵Kekreilamonyü pecha mo di a nouyieu puo thela chütatuo, mu a neikemo-u uko bie pesuokecüu nu phitatuo.

²⁶Krodi Jihovae Oreb tsiekrieu kinu Midian biekewa tuoi, uko vütuo, siro puo theu dzükezha mho sietuo mu puoe süu Ijipt nu pesiekeshüu tuoi pesieshütuo.

²⁷Mu sünhie puo pieu n bouka geinu lhouwa, mu puo vocieu n vo geinu bie pesuowatuo. Puoe Rimmon nunu khote,[11]

²⁸puo Ayat nu vorte, puo Migron pfüthe vote, Mikmash nu puo nya khapie bawa;

²⁹uko puozhau ciepfüte; theva Geba nu zhütuo; Rama pe bate, Saul Gibia-u tate.

³⁰Shiekhouishücie, he-i Galim nuopfü! Rünyüshücie, he-i, Laisha! Puo die kelashücie, he-i Anathoth!

³¹Madmenah tatuote, Gebim nu kelhouko krulietuoü di tate.

³²Thie teiso, puo Nob nu batuo, puo puo duthe kesüpie, Zion nuopfü kijüthou-u kietuo, Jerusalem kijükhru.

³³Harie, Kediu, Krodiko Jihova, kuo kemerie di puo coko sawatuo, sei kerükriethoko wiwatuo, mu puo cha kechako bie kerünuowatuo.

³⁴Puoe ketsa nu sei kedeiko[12] Seidurü se wiwatuo, mu Lebanon puo seibo kezhako ze tetsutatuo.