Read Angami Naga Isaya 11 Bible Online

Isaya 11 - Angami Naga bible

Isaya 11

¹Jese mvü nunu puo nuothe puo partuo, mu puo mieko nunu puoco puo lhou partuo.

²Jihova ruopfüu puo gei balietuo, mhasi mu kesikele ruopfüu, mharhükesi mu kekuo ruopfüu, mhakele mu Jihova keprei ruopfüu.

³Jihova kepreiu pie puo kenei chütuo. Puoe puo mhi pie kenguu geinu morei puo nyie pie kesiu geinu mha pepishü lho;

⁴derei puoe kemezhüu pie kejüko ca catuo, mu ketho se di kijü nu kokemoko la mha pepituo; puoe puo tie seitau pie kijü vütuo, mu puo me thesü pie kerüzhüko vütuo.

⁵Kemiatho pie puo chieca kepha chütuo, mu kedietho pie puo chie kepha chütuo.

⁶Socie-e tekuonuo ze batatuo, mu khurhüe temvünuo ze zhütatuo, siro mithunuo, losha mu kirinuoko kezelietuo, mu nhicumiayo puo thuo uko chathatuo.

⁷Mithu mu thega keze nha cütuo, uko nuonuoko keze zhütuo; mu loshae thudo tuoi rügu cütuo.

⁸Kenunuoyo tinyhü kerhupfü se ki mho geinu puo meruochütuo, mu thekhonuoyoe puo dzie pie nyhübvüpfü ki pemoutuo.

⁹Ukoe a kemesa kijüthouu gei mha bie pesuo morei bie pekalie lho; dzüe dzükezha tshupfü keba tuoi, Jihova mhasi thuo kijü ketshu chütaketuo la.

¹⁰Sünhie Jese mieu themiako mhodzünu zasi puo tuoi thalietuo; seyiekoe puo dze ketsotuo, mu puochü puobako zayie chü zotuo.

¹¹Sünhie Jihovae va kenieu puo dzie yhashütuo, puo themia lhielieketako pfhü kengulieketuo la; Asiria nunu, Ijipt nunu, Pathros nunu, Ethiopia[13] nunu, Elam nunu, Shinar nunu, Hamath nunu mu dzükezha khie kijüko nunu.

¹²Puoe seyieko la zasi puo se sieshütuo, mu Israel mia u thicüko pfhü kengu lashütuo, mu Judamia cüreketako kijü ke diako nunu pfhü kengushütuo.

¹³Efraim mia ngu puo rokecüu ba motatuo, Juda kemhimvükecüu dathewatuo; Efraim-e Juda ngu puo ro motatuo, mu Judae Efraim ngumvü motatuo.

¹⁴Derei unie thutsu niakratsa Filistin bouko vatuo, di unie keze niathutsa themiako pekatuo. Unie unie dzie pie Edom mu Moab petsoutuo, mu Ammonmiako unie die zetuo.

¹⁵Siro Jihovae Ijipt dzükezhau meü bie pesuo phrewatuo; mu puo kerüu mho puo dzie keleshütuo teikhrie keleu se, di süu chüpie rücü thenie chüwatuo; sidi pephi tuolie kevi cha chüshütuo.

¹⁶Siro puo themia lhiepie kebako la Asiria nunu chaü puo bu balietuo, Israelkoe Ijipt kijü nunu kepar ki uko la bakecü tuoi.