Read Angami Naga Isaya 13 Bible Online

Isaya 13 - Angami Naga bible

Isaya 13

¹Amoz nuou Isayae Babilon gei vorketuo ngukecü.

²Kijüthou methuocü puo gei zasi puo piesieshü, uko ki melie petoshülie; uko bu pehüko care nu lelieketuo la dziezie pie uko kieshülie.

³A a thuo a themia chü kemesakelieko ki diekhashüte, a nouyieu se mha chüshüketuo la, a terhümiaviko, a uko la kemiakoyakecü keviko kieshüwate.

⁴Rünyüliecie, kijüthou gei mhapfhe puo themia krodi puo meliekeshü tuoi! Rünyüshücie, kedi kekreikreicü, seyie kekreikreicü vor kengukelie pfhe! Krodiko Jihovae terhü chütuoü di rüpfhünuo puo kie kenguzhie.

⁵Ukoe kijü kepecie nunu, teiko thelatsa nu vorzhie, Jihova mu puo noupfhü rünyiekoe, kijüu pete pekawatuoü di.

⁶Kraliecie, Jihova teisozhau penuoketa la; Kuokejokejüu[15] kinu kepeka kevor tuoi süu vor zotuo!

⁷Süla thedzie pete thachütatuo, mu themia pete melou ze jütatuo,

⁸mu ukoe thedzükoutatuo. Kechü mu keziekere uko telietuo; uko thenumia nuonuovachü tuoi meyhumezhietuo. Ukoe huoniehuo meho thopfütatuo, uko zie tu partatuo.

⁹Harie, Jihova teisozhau vorzhie, zhosuo, noupfhü mu nouyie kemerie se di kijüu pekaperuowatuoü mu sünunu kephoumako pekawaketuo la.

¹⁰Teiko gei themvüko mu themvü kroko, uko kezie khashü motatuo; niaki thukepar nu rei zeitatuo, mu khrü puo kezieu bu zieshü motatuo.

¹¹Ae kijüu kesuo la siazha pie puo tsütuo, mu kerüzhümia u kephouma la; ae uko kemelha di kemiakoketuou pie puo thela chüwatuo, mu mia rünyüyakemo-u bie kerünuowatuo.

¹²Ae themia biepie suna kemesa ki rei tsakuowatuo, mu themianuo bu Ofir suna ki tsatatuo.

¹³Süla ae teiko chüpie peshütuo, mu kijü keniepie puo ba nu ba motatuo, Krodiko Jihova noupfhünouyieu kemerie chü kesie nhie,

¹⁴Chüzhie-e chüwhuomia kinu talietuoü ketuo tuoi, morei tekuo puo kepfhe kejü tuoi, mia pete puo thuo puo themia kitsa vatatuo, mu mia pete ta puo thuo puo kijü nu votatuo.

¹⁵Kehoupuorei ngukelieu rhükhriwatuo, mu kehoupuorei tekelieu zhiecha geinu siatatuo.

¹⁶Uko mhingu kinu uko nuoranuoko vütshiewatuo; uko kiko vawatuo, mu uko nupfünuoko shüwatuo.

¹⁷Harie, ae uko perhietuoü di Medesmiako, rakachü ü mhaü kemoko mu suna u neiya kemoko, pfükerhüshüzhie.

¹⁸Uko theü khriesako vakhriwatuo; ukoe nuobvü siu ngumezhielie lho; uko mhi-e nhicumia ngumezhielie lho.

¹⁹Siro Babilon, kedirüvieko zapuzayieu, Chaldianko zayieu mu uko mholieue Sodom mu Gomora mhietatuo, Ukepenuopfü uko pekakewa nhie.

²⁰Sünu mhakipuorei rüna chü lalie lho morei thephou puorei sünu lhou lalie lho; Arabmia puorei sünu puo pfheki pethoulie lho, kuopfheko puo rei puo kuo bu sünu zhülie lho.

²¹Derei nhachüko sünu zhütuo, mu ruo kekuo khunuo thuo uko kiko tshutuo; sünu Ostrik thuo lhoutuo, mu thelou thuo puodo whuotuo.

²²Puo rükhoubako gei socie thuo vo ruotuo, mu puo kediki keviko nu meseru thuo batuo, puotei süu penuo bate, mu puo teisozhako pecha salie lhote.