Read Angami Naga Isaya 15 Bible Online

Isaya 15 - Angami Naga bible

Isaya 15

¹Moab dze pukeshü. Khuzhü puo nu Ar pekawaketa la, Moab we chülie lhote; khuzhü puo nu ker pekaperuowaketa la, Moab we chülie lhote.

²Dibon-e[17] kratuoü di rüsuoki, thechü kerükrie gei khote; Nebo mu Medeba la Moab-e thekrü chü ba. Pete u tsü piete, pete u tiemie thie phrewate;

³chadiko nu ukoe gakhropfhe se pha; kitsüle gei mu kitiezhako nu mia pete kra mu u mhidzü krü tuote.

⁴Heshbon mu Elile shieshü, unie pfhe-e Jahaz ketso si vo; süla Moab pfhephrie metei mota;[18] puo melou peta.

⁵A noue Moab la kra ba; puo kitako ta Zoar nu vota, Eglath-shelishiya nu vo tso. Luhit nu kekho ki uko kra kho tso; Heronaim kevo cha nu ukoe mha pekakecü pfhe puo chüshü.

⁶Nimrim nu dzüko thedzükezei chüte; nhako rüwite, nha the kesalie mote, nha kepejo tuo mote.

⁷Süla uko mha kekra kengukelieko, mu uko kengukelieko keta se Sopfüciekhrie Rü cie vote.

⁸Mhapfhe puo Moab kijü whi vota; kekra pfheu Eglaim tsote, kekra pfheu Beer-elim tsote.

⁹Dimon dzüko[19] thezie thuo tshu; derei a Dimon[20] gei tsie rei sa shütuo, Moabmia takelieko la, mu kijü nu lhiekelieko la losha puo se vortuo.