Read Angami Naga Isaya 19 Bible Online

Isaya 19 - Angami Naga bible

Isaya 19

¹Ijipt dze pukeshü die puo. Mehoshücie, Jihovae kimhou ta kevi puo gei ba di Ijipt nu vorzhie; Ijipt nu terhuorhiko puo mhodzünu petatuo, mu Ijiptmia melou uko nunu ze jütatuo.

²A Ijiptmia kethoupie Ijiptmia ngumvü sietuo, sidi uko thuo kegeituo, mia puo thuo mia kekrei puo perhietuo, zanuo thuo zanuo perhie, nadi thuo nadi perhie, kedi thuo kedi perhie ituo;

³Ijiptmia ruopfü uko geiketuou jütatuo, mu a uko mharhüko bie kebvüwatuo; uko terhuorhiko mu kesiamia ruopfüko mu temiko tsiu ruopfü kekreiko rüsatuo.

⁴A Ijipt khapie puo zhokesuo niepu puo dzie nu shüwatuo; mu kedi puo zho kesuo puo uko mho dituo, Kediu, Krodiko Jihovae siya.

⁵Nail nu dzüko sotatuo, mu kerüu le di sotatuo;

⁶puo dzüchako kemecü chütatuo, mu Ijipt rü Nail coko tsata mu sotatuo, teikhrieko mu zovüko cieürietatuo.

⁷Nail khiera, Nail la thechü methuotatuo mu Nail-e prukeshü pete sotatuo, whuo petawatuo, tsiu ba sa motatuo.

⁸Khuoketekoe thekrü chütuo; khuoshüwi kelhoupie Nail nu shüyakecü peteko thekrü chütuo; mu jal kelhoupie dzü nu shüyakecü pete u chamezietatuo.

⁹Linen lopie mha chüyakezhako rei, zotsha pie pfhekedoko rei u chamezietatuo.

¹⁰Pfhekedoko u nyietatuo, mu zhakrakecü pete u nou suotuo.

¹¹Zoan kedinuoko nyathor; Faro pehü mhakesiko mha kesuo tarhoshüya. No kimhie di Faro ki, “A mhakesimia nuonuo keriekimia kedi yie” ikecü pulie ta?

¹²Nie donu mhakesiko kirapuo tuo ta? Uko bu krodiko Jihovae Ijipt petsouketuo la kedipuo rhüliete shikecü uko bu se n ki pu mu pesishülie.

¹³Zoan kedinuoko kenyamia chüte, mu Memfis kedinuoko mia bu u sewate; u thuo u seyieko donu puoke nu tsieko thuo Ijipt cha tha kekrüwate.

¹⁴Jihovae kebvükecü ruopfüu rupie uko nu shüwate; kemezemiae merü di pevüvü thayacü mhie, ukoe Ijipt chüpie mhatho pete nu pevüvüwate.

¹⁵Ijipt la mhapuorei chülie kevi tuo motatuo, puotsüu morei puo meiu rei, puoco morei puobo shierei.

¹⁶Sünhie Ijiptko thenumia mhietatuo, mu krodiko Jihovae uko petsou di puo dzie yhakesieu prei di petatuo.

¹⁷Siro Juda kijüue Ijiptmiako la kemerie puotatuo; puo dze pie kehoupuokirei pushü ro michietuo, krodiko Jihovae uko gei chüshütuoü di rhüse baketau la.

¹⁸Sünhie Ijipt kijü nu Kananmia die pu mu krodiko Jihova kitsa thatuoü di rüsekewa nadi pengou batuo. Hako donu nadi puo üse Niaki Nadiu üdi kietuo.

¹⁹Sünhie Ijipt kijü metsuo nu Jihova la ruosuoba puo batuo mu puo tierieki Jihova la tsiese puo batuo.

²⁰Süu pie Ijipt kijü nu krodiko Jihova la zasi puo mu zhapu puo chütuo; ukoe uko kepeseko Jihova ki rükhruoshü ro puoe kelakelie puo ketseshü uko tsütuo, mu uko yalie tsiu uko shüphrashütuo.

²¹Jihovae puo thuo puo pie Ijiptmiako pesishütuo; mu sünhie Ijiptko Jihova silietuo, di ruosuo mu kethe ruosuo chüpie puo rüsuotuo, mu sünhie ukoe Jihova ki uko die phrashütuo, tsiu süko chütuo.

²²Siro Jihovae Ijipt vütuo, vüshü di chü kemene lashütuo, mu ukoe Jihova ki la vortuo, mu puoe uko kecha rünyütuo di uko chü keshürhoshütuo.

²³Sünhie Ijipt nunu Asiria nu kevo chaü puo batuo, sidi Asiriako Ijipt nu vo, mu Ijiptko Asiria nu votuo, mu Ijiptko Asiriako ze rüsuotuo.

²⁴Sünhie Israel-e Ijipt mu Asiria ze di u seu chütuo, kijü metsuo nu theja puo chütuo,

²⁵krodiko Jihovae hai di uko tsütuo, “Ijipt sü a themia mu Asiria sü a dzie mhatho, mu Israel sü a kayie, hako thejakepfütho.”