Read Angami Naga Isaya 2 Bible Online

Isaya 2 - Angami Naga bible

Isaya 2

¹Amoz nuou Isaya Juda mu Jerusalem dze ngukecü die.

²Teisozha kenuotsa Jihova kiu kijüthou-u pie kijüthou kerükrietho chütatuo, sidi kijükhruko mho sietatuo; mu seyie pete kru puo vatuo.

³Themia kekra vor di sie, “Vorlie, uko Jihova kijüthou gei kho khe, Jakob Kepenuopfü kiu nu; puo bu puo zhoko pie u pethashü mu u bu puo chako nu tuolieketuo la” situo. Kekreilamonyü Zion nunu kepethakecü partuo, mu Jihova dieu Jerusalem nunu partuo.

⁴Puoe seyieko donu capi chütuo, mu themia kekra nyie pepituo; siro ukoe uko zhiecha ketsapie kejü chüwatuo, mu rüngou ketsapie zhiepfhinuo chüwatuo; seyie puoe zhiecha pie seyie kekrei petsou sa motatuo, morei ukoe terhüdo chü salie lho.

⁵He-i Jakob kiu, vorlie, uko Jihova kezieu nu tuo vo khe!

⁶Niekoe nie themia chako khawate, he-i Jakob kiu, ukoe niathutsa nu kevor thuophimia mu Filistinko kemhie themoumia bu uko ketshu chü, mu chazoumia ze kedziesete.

⁷Süko kijü suna mu rakachü thuo tshu, mu süko kinyi puo thela jü, süko kijü sü gura thuo tshu, mu süko gura gariko puo thela jü.

⁸Süko kijü sü terhuorhiko thuo tshu, süko nuketsu dziepie chükelie, u dziekinuo thuo chükelieko rüsuoya.

⁹Süla themia bie kerünuo, mu themia pete rei bie pekewate, süko kejo va hie!

¹⁰Tsiekrieu nu lelie, mu nyophe nu rüshülie, Jihova noupfhüu nunu, mu puo kedi zapuzayie kechü nunu.

¹¹Themia rükriekra ketuo mhiko bie kerünuowatuo, mu kemiako ketuo kehoupuorei bie kerünuowatuo. Mu sünhie Jihova rübei thuo rükrielietuo.

¹²Kemiako mu zhaketuo peteko, u pie pekho mu rükrie ketuo peteko petsouketuo la, krodiko Jihova teisozha puo ba;

¹³Lebanon nu sedarbo pete, zha mu rükrie kebako; mu Bashan phriebo pete petsouketuo la,

¹⁴Kijüthou kerükrie pete, mu kijükhru kezha pete petsouketuo la;

¹⁵dahou kerükrie pete, mu kuda houpiekeba pete petsouketuo la;

¹⁶Tarshish nu rou pete, mu mhatho kezivi pete petsouketuo la teisozha puo.

¹⁷Sidi kerüzhakecümia bie kerünuowatuo, mu kemiako ketuo kehoupuorei teshü kerünuowatuo. mu sünhie Jihova rübei pie kerükrieshütuo.

¹⁸Sidi terhuorhithoko jü phretatuo.

¹⁹Jihova kepreiu nunu mu puo kedi zapuzayie nunu rüshülieketuo la, tsiepfüko nu mu kijü khehoko nu leliecie; puoe kijüu keshüshütuoü kesie ki.

²⁰Sünhie themiakoe rakachü mu suna miarhiko, rüsuotuoü u thuo u la chükelieko, kelhoupie Seco mu Haho tsüwa di.

²¹Jihova kepreiu nunu mu puo kedi kezhau nunu, ratsa nu tase tsiepfüko mu tsiekhie kerkoko pfhütuo, puoe kijüu kechüshütuoü kesie ki.

²²U nyhüki nu rübei u kehaketuo themiau kinu rüreitacie, uko sü kedipuo mu?