Read Angami Naga Isaya 20 Bible Online

Isaya 20 - Angami Naga bible

Isaya 20

¹Asiriamia kediu Sargon-e chüpahiko mhokezhatho-u ketseshü di süu bu vor Ashdod perhie di sü lielie.

²Jihovae Amoz nuou Isaya ki pukeshü, “Volie, di n chieca nu gakhropfheu phreiwalie, mu n phi geinu n phikou rhuowalie” sishü, ru puoe sükemhie chülie, di methuo mu phithuo di chatuo tuota.

³Sitse Jihovae sie, “A thekeu Isayae Ijipt mu Ethiopia[24] kepetsou zasi puo chüketuo la cie se methuo mu phithuo di tuo.

⁴Sütuoi Asiriako kediue Ijiptmiako tepie kedie chü di zetatuo mu Ethiopiako[25] whuowatuo, nhicu rei phichü rei, methuo mu phithuo di, mu Ijiptmiako bu u thodza whe mo di mengalietuo.

⁵Sitse ukoe uko kemerü Ethiopia[26] mu uko mholieu Ijipt la uko dzükou mu uko ziekejü chütatuo.

⁶Sünhie dzükezha khie hatsa kebakoe hakemhie putuo, “Harie, we-e u merü kevorko mu Asiria kediu kinu u dzie nunu u kelalieketuo la we kekhruohi pfhü di ta u pfhü kevorko gei haite! Mu we, kikidi talietuo mu?” isituo.