Read Angami Naga Isaya 21 Bible Online

Isaya 21 - Angami Naga bible

Isaya 21

¹Dzükezhau rayha dze pukeshü die. Negeb nu khriewhiu rükhrie kevor tuoi, süue kijükesia, kijü kemeriekecü puo nunu.

²Ziemho kere puo a pesishüte; mia teshüyakezhau mia teshü, mu mha kepekaue pekashü. He-i Elam, tuo khocie, he-i Media, khahouliecie; puoe meheimelokecü pete a thuo bie pejüwatuo.

³Süla a chieca gei kemezhiekecü thuo tshute, kechü thuo a tepieliete, thenumia nuonuovachü tuoi; a nuketsute süla mhapfhe si mote, a a dzükoute süla mhangu mote.

⁴A nou rüsürüsate, kemichie thuo a kedewate; teiso pi kepar a pfhe kelho kebau a la pekecü puo chüte.

⁵Ukoe mizhü keseshü, ukoe pfheko khrashü, ukoe cü, ukoe krie. Sieliecie, kezhako, tier pie pezhüu kenheshülie!

⁶Niepuue a ki hakemhie puyakecü la: “Volie, rükhoumia puo bu thalie, puo bu ngukecüu pu rükhruoshülie.

⁷Puoe gura kesemia, mia kenie keze ketuo, gada gei ketuomia, ut gei ketuomia kengu ki puo bu rünyü menuoselie” si.

⁸Sitse rükhouu rükhruoshü: “Rükhouba puo gei a tha, he-i Niepuu, khinhie zhate, mu teizeizha pete rei a rükhoumia chü tha zo.

⁹Mehoshücie, gura kesemia kenie keduoduo di vorzhie!” si. Sitse puoe pu lacü, “Tetsute, Babilon sü tetsute; mu puo rhuo miarhiko pete puoe dutshedutshapie kijü zhüte” si.

¹⁰Harie, nyükewau mu hewaketau, krodiko Jihova, Israel Kepenuopfü kinu sikelieu pie a n pesishüzhie.

¹¹Duma dze pukeshü die. Mia puoe Seir nunu a kie di sie, “Rükhouu, theva kichiepuo ta? Rükhouu, theva kichiepuo ta?” si

¹²Rükhouue sie: “Teiso-u vorzhie, mu teizeiu rei sa. Mhanuü nie ketso nyü ro, ketsolie; lau la vorlie” si.

¹³Kijükesia dze kepu die. He-i, Dedanmia rüve kroko, nie rayha nunu razhü chütuo.

¹⁴He-i Tema kijü nu kebako, dzü se vor keterhüko tsücie, kecüca se vor kitako ze kesecie.

¹⁵Ukoe zhiecha nunu, zhiecha zupie ketuo nunu, theü gapiekelie nunu, mu terhü kere nunu tatuokecü la.

¹⁶Niepuue a ki hakemhie puya: Teicie puo donu, zhakhramia teicie kephrüu medzi di, Kedar kevi pete jütatuo;

¹⁷mu Kedar terhümiaviko donu theükeseko huoyo rübei peshashütuo; Jihova, Israel Kepenuopfü pushüketa la.