Read Angami Naga Isaya 22 Bible Online

Isaya 22 - Angami Naga bible

Isaya 22

¹Ziemho razhau dze pukeshü die. Nieko pete kedipuo le di kikhru gei sieta ga?

²Nieko melie kekuoko, metoumebe keba nadiu, puo nei keba nadiu. N themia siaketako zhiecha geinu sia mo, morei terhü nunu sia mo.

³Nieko mho diyakezhako pete keze tate; theü cie mo di uko teliete.[27] Nieko mia bu nie ngukelie pete teliete, ta petse phi nu vota zorei.[28]

⁴Süla ae pucü: A kitsa meho hie, a bu nousuo mhidzü pekrucie; a kekhriemiako pekakewa la a nou thupeluotuoü hie.

⁵Kekreilamonyü Niepuu krodiko Kepenuopfüe ziemho razhau nu, toutoukecü, kedekecü, mu rübvürübiekecü teisozha puo pie ba, dahouko vümeketuo mu kekhruohi la shiepie kijüthouko pesiketuo teisozha puo.

⁶Elam gura gariko mu gura chüpahiko ze di theütsie bou khepfü, mu Kir bu pezhü kewheu hieshü.

⁷Nie razha nie neithoko sü gari thuo tshute, mu gura chüpahiko kharuko nu thate.

⁸Puoe Juda kewheu chüsete. Sünhie noe ketsako kiu nu rünyieko mehotuo.

⁹Mu David nadiu cahou rürhuo phiketa ngushü, mu noe rüzie pekhro-u dzüko kengulie.

¹⁰Noe Jerusalem kiko phrülie, tsiu dahouu chü kemeteiketuo la kiko rhuowa.

¹¹Noe rüzie keweu dzü la tsiepfhenie donu dzükhou puo chüshü. Derei noe süu chükeshüu meho mo morei thiedzütho nu süu rhükeshüu sanyü mo.

¹²Sünhie Niepuu krodiko Kepenuopfü mia bu kra mu thekrü chünu, u tsüthie mu gakhropfhe dzienushü;

¹³derei süu sounu kenei mu thehe chü, thudo gei mu tekuo dukhri, themuo cü mu zu krie bata. “Úko cü mu krie khe, sodu siatatie eru” idi.

¹⁴Krodiko Jihovae puo thuo a nyie nunu puo pie a pesishü: kejo hau nie se mhodzü va nie tsülie lho zo, Krodiko Niepuu, Ukepenuopfü siya.

¹⁵Niepuu, Krodiko Kepenuopfü hakemhie puya: Vorlie, Shebna, ki kemeho-u ki vo di puo ki pushülie:

¹⁶No hanu kedipuo chüketuo ba mu? N kicükinumia suomia ba di n thuo n la haki nu mekhru thielie, mu kerükrie geinu mekhru thielie, tsiu tsiekrie geinu n kebachü chülie ga?

¹⁷Jihovae kuo phi di n kelhou kegewatuoüzhie. Puoe n theze tolietuo,

¹⁸puo n kewhiwhishü di tsierünuo puo tuoi di n kelhou pie kijü kemeya puo nu shüwatuo, sünu no siatuo, mu gura gari keviko sünu zhütatuo, he-i, no n niepuu kiu bie kemengakeshüu!

¹⁹Ae n mhatho nunu n whuowatuo, mu n tha nunu n teshü sekerwatuo.

²⁰Sünhie ae Hilkia nuou Eliakim, a thekeu kietuo,

²¹di n pfheneiko pie puo pedzieshütuo, mu n chiephau pie puo gei phashütuo. Ae n kekuou pie puo dzienu shüwatuo; mu puoe Jerusalem nu kelhouko mu Juda kiu krüu chütuo.

²²Ae David kiu cabi pie puo bouka gei shütuo; puoe khrüshütuo mu miapuorei khalie lho; puo khawatuo mu miapuorei khalie lho.

²³Ae gojal puo tuoi puo zhie tsapie mha kemetei puo gei shüwatuo, mu puoe puo puo nuo kiu la zapuzayie kediba puo chütuo.

²⁴Sidi ukoe puo puo nuo kiu mesi pete pie vo puo gei goutuo, puo nuosenuoyie mu nuothe, mhakhou kecükerü kehoupuorei, tehie nunu vo lipfhü ketso rei.

²⁵Krodiko Jihova pucü, sünhiesü gojal puo pie thechü kemetei zhiekeshüu rüzutatuo; mu süu dawa di tetsutatuo, mu thepie puo gei kezhau dathewatuo, Jihovae pushüketa la.