Read Angami Naga Isaya 23 Bible Online

Isaya 23 - Angami Naga bible

Isaya 23

¹Tur dze pukeshü die. Kraliecie, he-i Tarshish rouko, n dahouu pekawaketa la.[29] Ukoe Kupra nunu kevor ki ukoe süu silie.

²Sei mu zeitalie, he-i dzükhie kebako, he-i Sidon nu lhithoko, n dieliekoe dzükezha cie vote,[30]

³mu dzü kuo phicü nu tuowate; n khezhanuo sü Shihor nu lha, Nail nu lieyieu; noe seyieko lhitho-u zo.

⁴Mengaliecie, he-i Sidon, dzükezhaue die pushüte, dzükezha dahouu haishü: “Ae nuonuovachü chü mo, mu nuoze rei mo, ae khriesanuomia theke sier mo, morei rüünuomia rei se sier mo” si.

⁵Dieyieu Ijipt nu vor ro, Tur dze la uko nou kemezhietuo.

⁶Tarshish tsa pfütalie kralie, he-i dzükhie kebako!

⁷Nie nadi pu kerükrie kebau, puobo thiedzütho nu tuoketau, puo phi bu puo pfü vo pecie phi nu shükewau hau me?

⁸Keditsüre pie mia tsüyakecüu, Tur gei supuonie hau rhüshü ga? Puo lhithoko sü kedinuomia phre, mu puo lhithoko therhu themia phre ru.

⁹Krodiko Jihovae süu rhüshü, kemiakokecü zapuzayie bie perhuwaketuo la, kijü nu therhu pete pie kezhasewaketuo la.

¹⁰He-i Tarshish rouko,[31] nie thuo nie kijü nu pfülie, rou rüleichü ba sa mote.

¹¹Puoe puo dzie yhapie dzükezha mhoshüte, puoe kediko shükeniewate; Jihovae Kanan la diekhashüwate, puo dahouko pekawaketuo la

¹²Puoe pucü: No n nei salie lhote, he-i Sidon rüüphousepfü mia bu puo pesekezha, sielie, Kupra nu pfülie, sünu rei no kerülei ngulie lho.

¹³Chaldianko kijü mehoshücie! Themia hako ho, süue Asiria mo zo. Ukoe Tur pie nhachü ba chüwate. Ukoe dahou kerükrieko khahouliete, uko puo kedikiko bie pesuowa, ukoe puo pekawa.

¹⁴Kraliecie, he-i Tarshish rouko, nie dahouko pekawaketa la

¹⁵Sünhie yawinu cie hiethenie la, kedimia puo phouu nu, Tur rükra motatuo, cie hiethenie tseita tse, thethenupfü la tsali tuoi Tur gei vortuo;

¹⁶Kithar chü pielie, nadiu nu pralie, n rükra moketa thethenupfü! Thenoukemvü tsali chülie, tsali kekra chüshülie, n rükra lalieketuo la.

¹⁷Cie hiethenie tseita ro, Jihovae vo Tur mehotuo, mu puoe puo mhatho nu la votuo, di tei khro kelhou kedi pete ze thethelietuo.

¹⁸Puo lhitho mu puo mhakra chü kemesapie Jihova ki shütuo; süu keviepie balie lho morei kengu rei pie balie lho, derei puo lhitho nunu Jihova mhodzünu kebako la kecüca rei mu pfhemenei kevi kekra rei khashütuo.