Read Angami Naga Isaya 24 Bible Online

Isaya 24 - Angami Naga bible

Isaya 24

¹Tsie Jihovae kijüu pekawatuoü mu süu bie pie thedzükezei chüwatuoüzhie, mu puoe süu pesurhuwatuo mu sünu lhoukebako bie pie kecürewatuo.

²Siro themiako gei tuoi, zievomia gei rei tuo; mia dieu gei keshü tuoi, puo niepuu gei rei tuo; kituopfü gei keshü tuoi puo niepupfü gei rei tuo; kekhrüu gei tuoi, kezeu gei rei tuo; mia kethepuu gei tuoi thepukelieu gei rei tuo; mia kepecau gei tuoi, kecau gei rei tuo.

³Kijü bie peka tseiwatuo mu pesuo lotsowatuo; Jihovae die hau pushüwatacü la.

⁴Kijüu so mu rüwitatuo, kijüue mezie mu rüwitatuo, teiko rei kijüu ze mezietatuo,

⁵Kijüu puo gei lhou kebako khronu puo perhu pfüzhüte; ukoe thezhoko vacie, rhükelie zhoko varhuo, di telhekechachie diekho-u varhuowate.

⁶Süla rüse puoe kijüu mezuliete, mu sünu lhou kebako u kejo la kemezhielie; süla kijü nu kelhouko thewa, di mia huoyo rübei lhiekeshü zo.

⁷Khubezu sote, khubebo-u meziete, thenou kenei pete meheimelo bate.

⁸Timbrelko pfhe u keneiu bie zeiwate, u kenei pfhephrau jüte, übou kenei pfheu bie zeiwate.

⁹Khubezu krie di thepfhe chükeshüu sa mote; khubezu keviu rei kekriemia me nu pfhüte.

¹⁰Kebvükecü nadiu bierhuowate, ki pete khawa di mia puo bu rei lelie kenjüte.

¹¹Chaüko nu khubezu kejü la melie tuote; u kenei pete jüte; kijüu kenei whuowate.

¹²Thedzükezei thuo nadiu ketshu chüte, puo kharuko bietshebietshawate.

¹³Kijü nu mu seyieko donu hamhie zotuokecü la, Oliv bo puosi vüriekecü ki mhie, khubesi rielieta di puo sie kepakecü mhie.

¹⁴Ukoe uko pfhe chü, uko nei di keliya; uko niakratsa nu Jihova kekuo kezha pu keliyie.

¹⁵Süla niathutsa nu therhupie Jihova tsücie; dzükezha khieko nunu thetshepie Israelko Kepenuopfü Jihova zau tsücie.

¹⁶Kijü kela nunu we ketshe tsali siya, Kemiatho-u kerhu tsali siya. Derei a puya, a meziete, a meziete. A sü hieshiehieruo! Kecürümia cürü di mhachü; kecürümia cürüthor di mhachüketa la.

¹⁷Mha kemerie, mu thekreu, tsiu ciephrieu n gei ba, he-i kijü nu kelhou-u!

¹⁸Kemeriekecü pfhe si di takeshüu thekre nu tetsutuo; mu thekreu nunu li keprau ciephrie nunu puo malietuo. Teigei khirkiko khrüshüte, mu kijüu mvüdzeko rünieketa la.

¹⁹Kijüue pro babate, kijüu cierha krawate, kijüu keniepie mhapuo chüwate.

²⁰Kijüu kemezemia puo tuoi pevüvüte, kibenuo yopuo tuoi mele bate; puo kephoumako puo gei mesithorta di puo tetsute, mu la sielie lhote.

²¹Sünhie teiso Jihovae teigei nu teigei kro-u pechütuo, mu kijü gei kijü kediko pechütuo.

²²Kediemia mhie di uko kengupie thekre puo nu batuo; uko pie kedieki puo nu khawatuo, mu zha kekra sie uko pechütuo.

²³Sitse khrüu puo ziekejü chütatuo, mu niakiu mengatatuo; Zion kijüthou gei mu Jerusalem nu, krodiko Jihovae kedi chü di puo zayieu pie pehüko pengushüketuo la.