Read Angami Naga Isaya 25 Bible Online

Isaya 25 - Angami Naga bible

Isaya 25

¹He-i Jihova, no sü a Kepenuopfü; a n pu kerükrietuo, a n za tshetuo; noe ungomhathoko chükeshü la, thiedzütho nu rhüse tuote, süko dietho mu ketho zo.

²Noe nadiu vapie kepupie zhüwate, dahou nadiu pekaperuowaketa la; chazoumia kedikiu sü nadi chü mote, süu mhakipuorei chü lalie lhote.

³Süla kekuomiako n pu pevituo; mia rünyükemo nadiko n preituo.

⁴Noe kejüu keya puo zo, ketsopfhüu tsopfhü nhie puo keya puo zo, khriediu nu keya puo mu teikeleu nu teisü puo. Mia rünyükemo-u kerükhrie-e khriedi puo vo sozha puo hekeshü mhiei,

⁵chazoumia pfhe thechü keso puo nu kele kesier mhie, noe kimhou se keleu bie kerünuowate, mu mia rünyükemo-u tsali bie zeiwate.

⁶Krodiko Jihovae kijüthou hau geinu themia pete la, kecüca kevi pie thehe puo chüshütuo, khubezu kewe rüleketa pie kechü he puo, themuo puoshuo mu puo kelei kevi, khubezu rületa di puo dzü mesaketa pie kechü he puo.

⁷Siro puoe kijüthou hau geinu themia pete kewhe chü kebau mu seyie pete mho lhapiekezha keya pfheu bie pesuowatuo;

⁸Puoe kechachie la kesiau mezulietuo. Sitse Niepuu Ukepenuopfüe peteko zie geinu mhidzü süwatuo, mu kijü pete nunu puo themiako thethau setatuo, Jihovae pushüwaketa la.

⁹Sünhie mia hakemhie putuo, Harie, hau úko Kepenuopfü zo; hie-e puo pfhe vor, puo bu hie kelatuoü di. Hauha hie puo pfhe kevor Jihova zo; uko keze u neilie khe mu puo kelakelieu nunu keze u neilie khe.

¹⁰Jihova dzieu kijüthou hau gei balietuokecü la. Rügu kedepie thubuobou nu shükewa mhie, Moab kedepie puo chü nu shüwatuo.

¹¹Uko thuo u dzie kelhapie süko donu shü zoürei, dzükevümia u dzie kelhapie dzüvüyakecü mhie, kemiakokecüu bie kerünuowatuo, u dzie thuo meyhumezhie zhü zorei.

¹²Puo dahou kerükrieko sekerwatuo, kerünuo piezhüwatuo, kelhou pie kijü shüwatuo, nyophe nu ketso shüwatuo.