Read Angami Naga Isaya 26 Bible Online

Isaya 26 - Angami Naga bible

Isaya 26

¹Sünhie Juda kijü nu tsali hau chütuo: Hie nadiko kekuo puo ba; puoe kuokelieu pesiepie sozha mu dahou kemhieshüya.

²Kharuko khrüshülie, kemiatho seyie dietho bakelieu bu lelieketuo la.

³puo nou pie n gei kebau, noe puo bu menetshüi baya, puoe n peleyacü la.

⁴Kechachie Jihova peletuolie, Jihova Ukepenuopfüe kechachie tsiekrieu zocü la.

⁵Puoe kerükrie gei lhou kebako, nadi kerükrieu nu kebako pie kerünuo nu kewate. Puoe puo pieke kijü shüwate, puo kelhoupie nyophe nu shüwaya.

⁶Themia phi puo kedewa, kejümia phi, ketsopfhümia phichako.

⁷Kemiathomia cha we mezhü; He-i kemezhüu, noe kemiathomia cha bie kemejushüya.

⁸He-i Jihova, n capi chako nu, hie n pfhe ba, n zau mu n kerükrau sü hie ruopfü kemenguu zo.

⁹A ruopfüe theva gei n menguya, a nou ruopfüu n pfhü kelho ba. N capiko kijü nu keba ki, kijü nu kelhoukoe kemiatho silieya.

¹⁰Mhanuü kerüzhümia khrieshü rei, ukoe kemiatho silieya mo liro; kemezhümia kijü nu uko rüpfhi, mu Jihova kezha ngu lho.

¹¹He-i Jihova, n dzieu yhapie bate, derei uko süu si mo. N themiako la uko bu n shürheiu ngushü, di mengatacie. N ngumvüko miu bu uko mezuliecie.

¹²He-i Jihova, no hie la nouneu keseshütuo, hie mha chükelie pete, no hie la chü phreshüwate.

¹³He-i Jihova hie Kepenuopfü, no kemo niepu kekrei hie mho diwate, derei hie n za rübei pevielie.

¹⁴Kesiamia rheilie lho; mhakhrüe lasielieya mo, noe uko pechüshü di uko pekawa, mu uko kerükra pete vawacü la.

¹⁵Derei noe seyieu chü pekrashü, he-i Jihova, noe seyieu pekrushü; n chü pezhashüte; noe kijü rie pete bie kemeyaliete.

¹⁶He-i Jihova, kemezhielie tse ukoe n pfhü, no uko pechü di pethakeshü ki ukoe kecha chülie.

¹⁷Thenumia nuoze tei penuota ro, puo kechü pfü ruorüi mu meyhumezhiekezhü tuoi, hie rei n la sümhieta zo, he-i Jihova,

¹⁸hie rei nuonipfü, hie meyhumezhie, derei hie teikhrie penuokeshü zo. Hie kijü nu kuokelie puo nu rei kuolie mo, mu kijü nu kelhouko puorei penuolie mo.

¹⁹N kesiako rheilietuo, uko moko sielietuo. He-i nyophe nu kebako, colie, mu nie kenei la keliliecie! N thezei-e kezie thezei puo zo, mu kijüu hadzü nu siaketako pelhou lashütuo.[32]

²⁰Vorlie, a themiako, nie bouko nu lelie, sidi nie kikhako khawalie; noupfhüu bu rükreta kemochie, puotei keduoyo la nie thuo nie kevielie.

²¹Kekreilamoü, Jihova puo chü nunu parzhie, kijü themiako kerüzhü la uko pechütuoü di, kechüko pie mia kieshütuo, di puo geiwaketako whe sa motatuo.