Read Angami Naga Isaya 27 Bible Online

Isaya 27 - Angami Naga bible

Isaya 27

¹Sünhie Jihovae puo zhiecha kekhrü, kezha mu kemeteiu pie takevi tinyhüu Leviathan, rüwirügekecü tinyhü Leviathan petseishütuo, mu puoe dzükezha nu keba kesüdiu dukhriwatuo.

²Sünhie: U noukemvü khubelie puo dze kelilie!

³A, Jihova, puo keseu, a dzü pie puo va sei baya. Mia bu puo pesuowa molieketuo la, a theva khinhie puo pfhe baya.

⁴Ae noupfhü jü. Mhanuü zohu mu huphienuoko pie a tsü ücü we, ae sie uko ze kebietuo, a uko thewatuo.

⁵Moro uko bu a keyau lielie uko bu a ze vitho chüwalie, uko bu a ze vitho chüwalie.

⁶Vorketuo teisozhako[33] nu Jakob puomie krelietuo, Israel-e puo pou poulie mu puonuo thelietuo, sidi puosi vüpie kijü pete tshutuo.

⁷Puoe uko vükhrükeshüko vükeshü tuoi, uko vükhrüshü me? Morei uko kedukhriko dukhrikewa tuoi uko dukhriwa me?

⁸Nie whuokewa, mia die chüketa pie uko mese kechü zo; niathutsa teikhrieu kevor nhie puoe puo teikhrie kereu pie uko he petawa.

⁹Süla hau pie Jakob kejo-u bie pejüwatuo, mu hauha puo kephouma bakeshü puo si touta zotuo; puoe ruosuoba gei ketsieko pie nyokra getshiekewa tuoiwa ro, Asherako morei dhuna ruosuobako puorei ba motatuo.

¹⁰Dahou nadiu thedzükezei chü, rüna vawaketa mu khawaketa puo, nhatsa tuoite eru; sünu mithunuo nha liecü, sünu zhü mu puo coko thecütuo.

¹¹Puo coko siata ro, süko tsetaya; thenupfüko vor di süko pie mi chüwaya. Themia hakoha kesikele kejü kro puo eru; süla uko chükeshüu uko ngumezhielie lho; uko rhikeshüu uko nou lielie lho.

¹²Sünhie Eufrat rü nunu vo Ijipt rücüu ketso Jihovae telhako nyütuo, Israelmiako, nieko puopuo di pfhü kengutuo.

¹³Mu sünhie ketsü kezha puo khoushütuo, sidi Asiria kijü nunu jüketako mu Ijipt kijü nunu whuokewako vor di Jerusalem kijüthou kemesau geinu Jihova rüsuotuo.