Read Angami Naga Isaya 3 Bible Online

Isaya 3 - Angami Naga bible

Isaya 3

¹Kekreilamonyü Kediu, Krodiko Jihova, Jerusalem mu Juda kinu nu puo mvü dze kemetei se ketha, mu puo kekhrüko pete setazhie, kecüca bo pete, mu dzübo pete.

²Terhümiavi mu chüpahi, capi mu siedzekesi, thuophi mu phichü,

³mia hiepengou mhokezha mu therhu themia, mharhükesi mu meduokesi mu theguo dze kesi chüsetazhie.

⁴Sidi a thepfunuomia bu u kedinuomia chütuo, mu nuoranuomia bu uko mho dituo.

⁵Mia bu uko pesetuo, mu mia kekreimia puo bu puo pese; mu u zanuou bu u pesetuo; khriesamia phichümia gei kemharhütuo, mu miado-u therhumiau gei kotuo.

⁶Mia puoe puo kinumia, puo thinuomia puo zorei telie di sie, “No n pfhenei nyi; n bu úko krüta chütuo, mu mha peka kewa hako pete pie n khroshütuo,” situo.

⁷Derei sünhie kekreiu shie di sie, “A mia chü keshürhokezhau chülie kenjü, a a kitiekinu niekhrüda mu pfhemenei rei jü; nieko bu a pie themiako krüta chülie lho” situo.

⁸Jerusalem-e kate mu Juda tetsuketa la, kekreilamonyü uko diepu mu uko mhatho Jihova petsou di uko zekeba puo zayieu perhuwate.

⁹U zie kenguu thuo u kejo thashüya; sükoe Sodom mhiei u kephouma rükhruoya. Sükoe süu kevieya mo, süko we kesuokerhu! Kekreilamonyü u thuo u gei kesuo se vor.

¹⁰Kemezhüko we kiderei ruokuo shi, ukoe u mhatho siu cü zotuo eru.

¹¹Kerüzhüu gei kesuo kerhu! Kidepuo uko ruosuo shi, uko dziepie chükeshüu uko gei chü la zotuo.

¹²A themiako nhicumia bu uko pese, mu thenumia bu uko mho di. He-i a themiako, nie krütakoe nie cha tha kekrüya, mu nie chako bie kebouwaya.

¹³Jihovae puo nyieu putuoü thate, puoe themiako capi chütuoü thate.

¹⁴Jihova puo themia phichüko mu kedinuoko zelie di dienyakecütuoü lete: Khubelieu cükelieko sü nieko ze; kejüko vie ketakelieko nieko kinu ba.

¹⁵Nieko a themiako gechiekeshü mu kejümia zieko gekeshü kedipuo ca la ga? idi Jihova krodiko Kepenuopfü puya.

¹⁶Jihovae sie: Zion nuopfüko kemiako, mu u vo peto pie di tuoya, uko mhi lala di mha meho, u chatuo mia rünyükemo chatuo, uko phi thetsei kekreikreikecü la;

¹⁷Jihova Zion nuopfüko tsüle gei kechüpfü puo pie pechüshütuo, mu Jihova uko kemengako hieshütuo.

¹⁸Sünhie Jihovae uko rütsonyako; uko phikhako, u tsügei keshüko, mu khrükia mhiko;

¹⁹keliekecüko, kethuoko, vozipfheko,

²⁰u tsügei rütsoko, u thuoko, vatshiko, mhare kevi bouko, mu theguobouko,

²¹zasi dziekhako, nyhükhako,

²²thenyipfheko, pfhe kerütshuko, u kewhe pfheneiko mu likhuoko;

²³pfhekevi pfheneiko, linen pfheneiko, tsüzeko, mu u ziekeya pfheko setatuo.

²⁴Puore kevi sounu menakecü batuo; terha sounu kero puo; u tsütha kevi sounu tsüpie batuo; mu puoma kere pfhedzie sounu gakhropfhe chiecha; zivi sounu thenga batuo.

²⁵Thepfumiako zhiecha geinu tetsutuo, mu nie terhümiaviko rüyachü nunu tetsutuo

²⁶Mu süpfü kharu nu thekrü chü mu kratuo, puo menyümenouwa di, puo bu tsu kijü batatuo.