Read Angami Naga Isaya 31 Bible Online

Isaya 31 - Angami Naga bible

Isaya 31

¹Kekhruohi la Ijipt nu ketsuko we chülietie, mu gura pelekebako, guragari krakecü la tsiu gurakeseko kuo phi üdi pele kebako, derei Israel la Kemesau meho mo, morei sanyü kemoko we ce chülietie!

²Sirei puoe mhasi di kepeka se vorya; puoe puo dieko rhü laya mo, derei kesuo kechü kinuko gei sietuo, mu kephouma kechü nu kekhruohiko petsoutuo.

³Ijiptko sü themia zo, mu Ukepenuopfü mo; uko gurako sü chüüphou zo, mu ruopfü mo. Jihova puo dzie yhakeshü ki, mia kekhruohiu puo phi mesütuo, mu mia bu puo kekhruohiu rei tetsutatuo, sidi uko pete keze tetsutatuo.

⁴Jihovae a ki hakemhie pucü la, Losha puo morei loshanuo yopuo puo chüte cütuoü di nge ba, mu kuopfhemia kroko kieshü rei, uko melieshü zorei michieta mo morei uko pfhe la merota kemo tuoi, krodiko Jihovae tsur di Zion kijüthou mu puo kijükhru geinu kegeituo.

⁵Pera gapfükezha tuoi, krodiko Jihovae Jerusalem rüyatuo; puoe süu yalie mu shüphralietuo, puoe süu lhieshü mu kelashütuo.

⁶He-i Israelmiako, nieko puo petsouthor tuoketau ki rürei la vorliecie.

⁷Sünhie nie thuo nie la nie dzie pie phouma di chükelie rakachü mu suna miarhiko kelhouwatuo.

⁸“Sitse Asiriamia themia geinu mo di zhiecha geinu tetsutuo; tsiu themia vie kemo zhie puo puo mezulietuo; sidi puoe zhiecha nunu tatuo, tsiu puo khriesako kemvü chüpie mhachütuo.

⁹Puo tsiekrieu michie di jütatuo, mu puo kezhako michie di pfhelhau va di tatuo,” Jihova puo mi Zion nu keba, mu puo miphu Jerusalem nu kebaue siya.