Read Angami Naga Isaya 32 Bible Online

Isaya 32 - Angami Naga bible

Isaya 32

¹Harie, kedimia puoe kemiatho nu dituo, tsiu kedinuokoe kemezhü nu mha kekhatuo.

²Uko kehoupuorei teikhrie nunu rüshükelie chü puo, khriedi nunu u yalieyakezha puo, thechü keso puo nu dzü kenyi rü tuoi, thedzükezei nunu kijü nu tsiekrie khrü puo mhiei tuo.

³Sitse mha nguyakecüko mhimietalie lho, mu rünyükecüko mhapfhe silietuo.

⁴Kemeyhuko mhale menuotuo, mu diepu kethekecüko meü diepu merhü mu pu mesatatuo.

⁵Kenyau üse thetseimiaü kie salie lho, mia kepesemia üse therhu themia üsa motatuo.

⁶Kemelomia kerhanyacü die puya mu uko noue mezhü kemo do rhüya: Ukepenuopfü zho kemo chüketuo la, Jihova dze pu kekrüshüketuo la, kemerüko menguu chü molieketuo la, mu keterhüko bu kekrie jülie kelho la.

⁷Mia kepesemia mharhü pete mia kepese mharhü; ukoe kesuo nunu mha kesuo rhüya, ketsopfhüko mezhü kenyi nhie zorei ketijü die pie kejüu pekawaketuo la.

⁸Derei u noukemeyamia mha kevi rhüya, mu mha kemeya nu thashüya.

⁹Sieliecie, nie thenumia lhou rüü kebako, a pfhe rünyüliecie; nie kedzüluo keba rüünuoko, a diepu rünyüshücie.

¹⁰Teicie puo zie ba mo di nie kemezhietuo, nie thenu kedzüluokecüko; khube lieyieu suotatuo, mu nhasi lieyieu vor motaketuo la.

¹¹Pe zoliecie, nie thenumia lhou rüü kebako, nie kedzüluo kebamia, kemezhietuo, nie pfhenei rhuowalie, di methuotalie, sidi gakhropfhe pie nie chiecalie.

¹²Nie merü ketouliecie, lie keviko la, puo yie kevi khube la.

¹³A themiako kijü nu zohu mu huphienuo bu ketshu chü sierkezhüu la; uwe, nadiu nu keba thedzükezie ki peteko la.

¹⁴Kedikiu rükra mo votaketuo la, nuolhou kekra nadiu nu lhou motatuo kijükhruu mu rükhouba shadzeu, kechachie khunuo bou chütatuo, nha gadako neituo mu peri kroko tuo chüketa la;

¹⁵peso geinu ruopfü puo u gei rushü, mu rayhau pie lie kevi chülie, tsiu lie keviu ketsa chülie kemochie.

¹⁶Sitse kemezhüu rayha nu lhoutuo, mu kemiatho-u lie kevi nu batuo.

¹⁷Kemiatho süu geinu vitho partuo, mu kemiatho geinu mhieikecü mu kechachie pelekecü partuo.

¹⁸A themiako menetshüikecü nu lhoutuo, khrukhrecü keba nu, mu mhiei di rüleikelie chü nu lhoutuo.

¹⁹Ketsa jü tseitatuo,[39] tsiu nadiu bie kerünuo phrewatuo.

²⁰Nie rücü khie nu tsia vayakecüko, thudo mu gada khashü, u medo chü rühouyakecüko, nie neilietuo.