Read Angami Naga Isaya 33 Bible Online

Isaya 33 - Angami Naga bible

Isaya 33

¹Ce, no mha kepekau, kepeka n gei vor kemo-u; no kecürüu, mia bu n sekeda kemo-u! No mha peka moketa nhie, n pekawatuo; mo noe cürü moketa nhie, mia n sekedatuo.

²He-i Jihova, hie ngumezhiecie; hie n pfhe ba zo. Teisoduü hie bou chüliecie, kemezhiekecü ki hie kelakelieu chüshücie.

³Keboukecü pfhe sishü tse, themiako tata; n kekuo kezha mhodzünu, seyieko cüretaya.

⁴Zope-e vo kepelepfü bayakecü tuoi; mha vakelieko kengulieya, kuprie keprou tuoi, ukoe prou puo gei vaya.

⁵Jihova meyieliete, puoe kerükrie gei baya; puoe kemezhü mu kemiatho se Zion ketshu chüwatuo.

⁶Puoe n teiu nu rüserünie kemo-u chütuo, kelakelie, mhasi mu kesikele rei kha phishütuo. Jihova keprei pie Zion kinyi chütuo.

⁷Rünyüshücie! terhümiaviko chadi nu krazhie; vitho dielieko kra phizhie.

⁸Chapfüchaüko nu tuo mote, rüvemia cha nu tuo mote. Kepfhekhokelie rhüwate, rüseko rhu mote, thepha dieko se mhaü tuo mote.

⁹Kijüu kra mu meziete; Lebanon-e puo ziejü di rüwite, Sharon-e kijükesia puo tuoite; tsiu Bashan mu Karmel seiboko nyü piete.

¹⁰“Tsie we a sietuo” Jihovae siya, “A tsie we a pie kerükrielietuo; tsie a chü pezhalietuo.

¹¹Nieko shübe nuonipfülie, sidi rügudo penuoya; nieko thesü sü nieko the pejüwaketuo mi puo zo.

¹²Siro themiako thepie nyokra chükewa, zohu dawa di mi nu thekewa mhietatuo” siya.

¹³Nie petse nu ketuoko, a kedipuo chüshü shi, rünyüliecie; mu n kepenuora kebako, a kekuo pesishücie.

¹⁴Zion nu kephoumako michiete; terhuo prei kemoko pekhrukhrute: “U donu supuo mha the pejükecü miu ze balie vi ga? U donu supuo kechachie miü ze balie vi ga?”

¹⁵Miatho di thayakecüu, mu dietho puyakecüu, mia pese di mha ngukelieko rütseyakecüu, thesokelie sou nu süu melieyakecüu, theziekepekru die rünyü mo di puo nyieto mekalieyakecüu, mu mha kesuo meho nyü mo di mhimielieyakecüu,

¹⁶sükoe kerükrieko gei batuo; puo kudae tsiekrie dahou tuo; puo cava pie puo tsütuo, puo dzükrie la nouca jü.

¹⁷N mhi pie kediu zivi nu keba ngutuo; uko kijü meya phikecü puo ngutuo.

¹⁸N noue kemeriekecüu medo n dzükerüchü tuo: “Phrüyakecüu kirapuo ba ga? Khezhanuo mesi mejükecüu kirapuo ba ga? Rükhoubako phrüketuou kirapuo ba ga?” itatuo.

¹⁹Kethesükecüko no ngu sa motatuo, no sikemo die puyakezhako, no puoca sikemo die se kerüchüyakecüko.

²⁰Zion gei mehoshücie, thenyiko nadiu sü! N mhi-e Jerusalem ngutuo, sei-i zei-i keba chü puo, rhuo kedilie kenjükecü pfheki, puo seizhieko phelie kelho puo, mu puo roko puorei tetalie kelho puo.

²¹Derei sünu Jihovae kekuo kezha nunu u la batuo, kerü kemeya mu rücü kezhü thechü puo, sünu roukethousei sekecü rou volie kenjü, morei rou kezha puorei volie lho.

²²Jihovae u capiu, Jihovae u kekhayakezhaucü la, Jihovae u kediu, puoe u kelalietuo.

²³N nou ro-u rünyhute; süko puorei rou codiu ro khe kemetei pie balie kenjüte, morei rou pfheu kelhapie balie kenjüte. Sitse mha vakelie mu ketakelie kekra kezatuo; phiyhoko zorei mha ketatuo.

²⁴Sünu miapuorei, “A suo balie” ilie lho; themia sünu kebako kejo va uko tsütuo.