Read Angami Naga Isaya 34 Bible Online

Isaya 34 - Angami Naga bible

Isaya 34

¹He-i seyieko, penuo vorcie rünyüketuo la; harie themiako, rünyüliecie! Kijüu tsiu sünu ketshu chü keba pete; kijüu mu sünunu kevor pete bu rünyüliecie.

²Jihovae seyie pete gei puo nei mote, mu u rüpfhünuoko gei puo noumeyie phite; puoe uko pejowate, uko khapie dukhrikewa nu shüwate.

³Uko dukhrikewako kelhouwatuo, mu uko moko kecie re mena siertuo, kijüthouko gei uko zie thuo krutuo.

⁴Teigei krodiko pete zeüjütatuo, mu teiko leshütshü puo tuoi tshüpfü khotatuo. Uko krodi pete rünietatuo, khubenyü rürietayakezha tuoi morei chiede rürietayakezha tuoi.

⁵A zhiechaue teigeinu krie mezelie tse, legei, süu Edom gei kertuo, a pejokewa themiako gei capi chüshütuoü.

⁶Jihovae zhiecha puo ba; süu thezie thuo tshutuo, cüpie luotshüpfü, tekuonuo mu temvü zie üse, tekuochü mecü shuo üse, Kekreilamonyü Jihovae Bozra nu ruotho puo chü, Edom kijü nu kedukhri kezha puo sier.

⁷Nhathudoko rei süko ze tetsutuo, mu thudonuo rei thudo kezha ze di. Uko kijü thezie pie petsetuo, tsiu uko nyo chüshuo pie va pevi se tuotuo.

⁸Jihovae khepu teisozha puo ba, siro Zion nyieu la zhakhra khashüketuo teicie puo ba.[40]

⁹Edom rüko[41] the pezhapie alakatar, mu puo nyo mitsie mevitatuo; puo kijü pie tukezhü alakatar mhiewatuo.

¹⁰Theva rei khinhie rei süu mhelie motatuo; puo ketu khu sei zhü zotuo. Thephou puo sie thephou puo nu zorei süu kemethuo zhü zotuo, miapuorei tuo se süu pfüthe sa motatuo.

¹¹Derei rümou mu chiekru kecütho thuo süu pebalietuo, putshüü mu shüzha kezhau sünu batuo. Puoe kebvükecü ro-u teshüpie sügei zo voshütuo, mu rübvürübiekecü la pie pehüko gei shütuo.

¹²Ukoe süu za pie ‘Sünu Kedirüvie Jü’ isituo, mu puo kedinuoko kemethuo phre zotuo.

¹³Puo dahouko gei zohu lhoutuo, puo kudako gei zozie mu kikhahu lhoutuo. Süu meseruko tuo chütatuo, mu Ostrik rapfü kebachü chütatuo.

¹⁴Chücükoe socie ze kesetuo, temvü-rhuo re huoniehuo kietuo; sünu teizeirhuopfü vor balietuo di puo rüleiba puo chülietuo.

¹⁵Sünu putshüü puo kru chü mu pedzütuo, mu kolie di puo nuonuo kengupie puo khrükhro shütuo; sünu rümouko vo kengutuo, puokrü puodzü kesiedzi di.

¹⁶Jihova leshüdau nunu pfhü mu phrüliecie; Hako puorei tsei kemo chülie lho. Jihova tie thuo die khashüte, mu puo ruopfü thuo süko kengulieketa la.

¹⁷Puoe uko la dapeshüte, puo dzie nu kero se di kezapie uko tsüwate; ukoe kechachie süu pevielietuo, thephou puo sie thephou puo idi ukoe sünu lhoutuo.