Read Angami Naga Isaya 35 Bible Online

Isaya 35 - Angami Naga bible

Isaya 35

¹Rayhako mu kijü kesoko u neituo, kijükesiau puo nei di poupartuo; terhuobiepfü pou tuoi,

²puoe pou phi zotuo, sidi puo keneipfü kelituo. Lebanon zapuzayieu pie puo tsütuo, Karmel mu Sharon mesümede keba. Ukoe Jihova zapuzayie ngutuo, Ukepenuopfü kekuo kezha.

³U dzie kethachüko chü pekuoshülie, mu u khudza kemezieko chü kemeteishülie.

⁴U melou kesuoko ki hakemhie pushülie, “Meteilie, michie hie! Harie nie Kepenuopfü ba. Puoe khepu mu zhakhra kemeriekecü se vortuo. Puoe vor di nie kelalietuo” si.

⁵Sitse mhicieko mhi vilietuo, mu nyievüko nyie rüvü motatuo;

⁶sitse phiyho-u chüzhie tuoi rüthetuo, mu keliehuo-u puo keneipfü kelituo. Rayha nu dzüko rüluo partuo, mu kijükesia nu rücü dzü krutuo.

⁷U thekezhü theshünyoko dzükhou chütatuo, mu keterhü kijüu dzüluo chütatuo, meseruko ketuo chüu guodzü chütatuo,[42] nhako tekhrie mu zovü chütatuo.

⁸Sünu chaü puo batuo, mu süu pie Kemesa Chau üdi kietuo. Mesa kemoko sügei rüve volie lho; derei sügei Ukepenuopfü themiako la zotuo, rüvemia puorei, kenyamia zorei sünu kekrütalie lho.

⁹Sünu losha puorei balie lho, morei mha tekecü khunuo sünu parlie lho; sünu süko puorei ngulie lho, derei rhalieketako sünu tuotuo.

¹⁰Sidi Jihova rhakelieko la vortuo, mu Zion nu keli vortuo; kechachie u kenei pie u tsü geishü di; ukoe u kenei mu u dzükezie ngulietuo, tsiu nousuo mu meheimelokecü ta kepecie nu votatuo.