Read Angami Naga Isaya 36 Bible Online

Isaya 36 - Angami Naga bible

Isaya 36

¹Hezekia kediu dikelie cie keredia cie, Senacherib süu Asiria kediu khor Judamia dahou pete whuo di süko lielie.

²Sitse Asiria kediue Lakish nunu Rabshake ketsepie Jerusalem nu Hezekia kediu ki shü, chüpahi kekra sa di. Sitse puoe Pfhekemenyiu Phiechü lie nu kekho chau rüzie peso-u dzüyie thela ki thalie.

³Sitse sünu Hilkia nuou Eliakim kinu mhokezhau, mu kethuu Shebna, mu Asaf nuou Joah, thedzethuyakezhaue puo ki khor,

⁴Sitse Rabshake-e uko ki, “Hezekia ki pushücie; Asiria kedi kezhau puya: No kedipuo pele hai ba ga?

⁵No die rübei se terhü nu thedo mu kekuo chülie thenyüsie me. no supuo pele di a perhie petsouya ga?

⁶Harie noe Ijipt pele tha die, tekhrie the tseketau, puo vakhrie kephimia kehoupuo dzie rei zewaya; Ijipt kediu Faro gei rüzhü ketha kehoupuorei sümhie zotuo.

⁷Derei mhanuü no a ki, ‘Hie Jihova hie Kepenuopfü pele tha,’ iro, Hezekia-e puo thechü kerükrieko mu ruosuobako bierhuowa di Juda mu Jerusalem ki, ‘Nie ruosuoba hau mhodzünu nu rüsuotuo’ ishü moü me?

⁸Süla tsie vorlie, a Jihova Asiria kediu ze mhapuo pepi toulie: Ae gura nyie kenie pie n tsüshütuo, no n yako seketuo themia pfhülie vi ro.

⁹No gura mu gurachüpahi la rei Ijipt pele kethachie kikidi a niepuu liethoko donu kecütho kriemhokezha rei whuolie vituo mu?

¹⁰Sizomonyü Jihova sa mo di a kijü hau pekatuoü petsou khor me? Jihovae a ki, kijü hau petsou kho di puo pekawalie,” sishü.

¹¹Sitse Eliakim, Shebna, mu Joah sie Rabshake-u ki, “N pezie rei Aramaik nunu n kituoko ki pushücie, hie süu si ba; dahou nu mia kesi kinu Judamia die nunu hieko ki mha pu hiecü mu” si.

¹²Derei Rabshake sie, “A niepuue a bu n ki mu n niepuu ki sie, themia dahou gei kebako, nie ze di u buo cü mu u pezu krieta ketuoko ki pu hienu di a ketseshü me?” sita.

¹³Sitse Rabshake-u siethalie di Judamia die nunu shiekhoui di, “Kedi kezhau, Asiria kediu dieko rünyüliecie!

¹⁴kediu hakemhie puya: ‘Hezekia bu nie se hiecie, puoe nie shüphralie lho.

¹⁵Hezekia bu nie ki, Jihova u shüphralie zo, nadi hau pie Asiria kediu dzie nu shüwa lho zo, ikecü pu di nieko Jihova khre merü bata hiecie.’

¹⁶Hezekia pfhe rünyü hiecie, Asiria kediue haikecü puya: ‘A ze vitho chüwalie di a ki partalie; sitse nie kehoupuorei nie thuo nie chiedebo-u geinu cütuo, mu nie thuo nie dzübou nunu dzü krietuo,

¹⁷a vor di nieko ze nie thuo nie kijü mhiekecü puo nu, telha mu khubezu kenyi kijü puo, kecüca mu khubelie kenyi kijü puo nu volie kemochie.

¹⁸Hezekia bu, ‘Jihova hie shüphralietuo’ ikecü pu di nie chatha kekrüwa hie, seyieko rhuo huo Asiria kediu dzie nunu puo kijü shüphralie me?

¹⁹Hamath mu Arpad rhuoko kirapuo tuota ga? Sefarvaim rhuoko kirapuo tuota ga? Sükoe a dzie nunu Samaria shüphralie me?

²⁰Rüna hako rhuoko donu suomianie a dzie nunu u rüna shüphralieü di Jihovae a dzie nunu Jerusalem shüphrashütuoü ba ga?” sita.

²¹Derei ukoe kemekrie di dieca puorei pu puo die kela mo, kekreilamonyü kediue, “Puo die kela hiecie” idi die khakeshü la.

²²Sitse Hilkia nuou Eliakim, kediki mhokezhau mu kethuu Shebna mu Asaf nuou Joah, thedze kethuu uko pfhe cierha zo di Hezekia ki vor Rabshake-u dieko pie puo ki pushü.