Read Angami Naga Isaya 37 Bible Online

Isaya 37 - Angami Naga bible

Isaya 37

¹Hezekia süu sishü tse, puo pfhe cierha di gakhropfhe pie puo whelie, sidi Jihova kinu le.

²Sidi puo kediki nu mhokezhau Eliakim mu kethuu Shebna mu phichüko donu thetseiko bu gakhropfhe dzielie di, uko ketsepie Amoz nuou Isaya siedzekesiu ki shü.

³Ukoe puo ki, “Hezekia hakemhie puya, thie kemezhiekecü teisozha, mia kerhiekecü die, mu thenga chükecü; nhicumia penuoketuo, derei penuoshüketuo kekuo tuo mote.

⁴Rabshake-ue puo niepuu Asiria kediu bu rheiketuo Ukepenuopfü kengashünu di puo ketsekeshü mu puo dieko Jihova n Kepenuopfü sishüte; süla lhiese kebako la no kechachüshücie” si.

⁵Kediu Hezekia thekeko Isaya ki vor tse,

⁶Isaya sie uko ki “Nieko niepuu ki pushülie, ‘Jihova hakemhie puya, No sikelie dieko, Asiria kediue pesekecü dieko la michie hie.

⁷A thuo ruopfü puo pie puo nou shüshütuo, di puo bu diekrie puo si di puo kijü nu la votatuo, puo bu puo thuo puo kijü nunu zhiecha geinu siatuo,’ ” sishü.

⁸Rabshake-u la vor, ru Asiria kediu Libna ze kegei keba ngulie; puoe kediu Lakish nu ba motaücü sikelie la.

⁹Sitse kediue Ethiopia[43] kediu Tirhaka dze sikecü, “Puo n ze kegeituoü di tuoshüte ho,” si. Siro puoe süu silie tse, puoe dieliemia ketse pie Hezekia ki shü di pucü,

¹⁰“Nieko hamhie di Juda kediu Hezekia ki pushücie; No puo pele keba n Kepenuopfü bu n sewa hie, Jerusalem pie Asiria kediu dzienu shüwalie lhoü di phrakeshüu.

¹¹Harie, Asiria kedikoe kijü pete gei kedipuo chüshü vor shikecü mu uko pekapemhewakecü nie sishüte, siro nie shüphralie viü ba me?

¹²A puonuokoe pekawaketa seyieko, Gozan, Haran, Rezef mu Telasar nu keba Eden themiako, seyie süko rhuokoe uko shüphralie me?

¹³Hamath kediu, Arpad kediu, Sefarvaim nadi nu kedi, Hena kediu morei Iva kediu kirapuo bata ga?”

¹⁴Hezekia-e dielieko dzie nunu leshüu ngulie, di phrüshü; sidi Hezekia-e Jihova kiu nu kho di leshüu lhapie Jihova mhodzünu shülie.

¹⁵Sitse Hezekia-e Jihova ki cha di,

¹⁶“He-i Krodiko Jihova, Israel Kepenuopfü, Cherubko mho kediba gei kebau, kijü nu kedi pete mho, no rübei Ukepenuopfü zo; noe tei mu kijü chüshüe.

¹⁷He-i Jihova n nyie kedeishü di rünyüshücie; he-i Jihova, mhirhoshücie di mehoshücie, sidi Senachirib-e rheiketuo Ukepenuopfü kretuoü di ketsekeshü dieko rünyüshücie.

¹⁸Ketho zo, he-i Jihova, Asiria kedikoe seyie pete mu uko kijüko pekawate;

¹⁹mu u rhuoko kelhoupie mi nu shüwate, kekreilamonyü süko terhuomia mo, derei themia dzie mhatho sei mu ketsie zo, süla uko pekawate.

²⁰Süla tsie, he-i Jihova hie Kepenuopfü, puo dzie nunu hie kelaliecie, sitse kijü nu kedi pete rei n rübei Jihova ükecü silietuo.”

²¹Sitse Amoz nuou Isaya mia ketsepie Hezekia ki shü di sie: “Jihova Israel Kepenuopfü hakemhie puya: Noe Asiria kedi Senacherib la a ki chakecü la,

²²Jihovae puo dze pukeshü dieu hau; ‘Puoe n rütseya, puo n krenyüya Zion nuo phousepfü; puoe n sietsa nu-tsüge thaya, Jerusalem nuopfü.

²³‘No supuo kre mu pu pesuoya ga? No supuo petsou di n pfhe kerükrie mu kemiako di n mhi pelapie ba ga? Israel kemesau petsou di!

²⁴N kituoko geinu no Jihova krenyüwate, mu noe sie, “A guragari kekra bakecü ze di a kijüthouko kerükrie gei khowate, Lebanon thechü kesouko nu vowate; ae puo sedarbo kerükrieko, puo saipresbo kevithoko wiwate; ae puo thechü kerükrie kepecietho gei khowa, mu puo tsa kedeitho nu lewate.

²⁵‘A dzükhou ho mu dzüko ücü, a a phizhüu pie Ijipt rü nu dzü pete bie pesowa.”

²⁶A thiedzütho nu rhüse tuoketa no si moluo me? A tsie chü vorkezhüko thiedzütho nu rhüse tuote, n bu dahou nadiko bierhuo kesekebawatuoü di.

²⁷U themiako u kekuo jü di pesuoperuo mu rübvürübieta, mu lie nu nha mhie, mu nha kemene tuoi, kijü gei nha keba rüchülie kemo nu rüwiketa tuoi.

²⁸‘A no siekecü mu no baketsu, n kepra mu keler tsiu a gei n nou rüpe keba siya.

²⁹Kekreilamonyü no a perhiekecü, mu kemelhakecü vor a nyie tsote, a cawi pie n nyhü nu shütuo mu gura mekedou-u pie n me doutuo; a n shükerei la pie no kevor chau nu shüwatuo.

³⁰“ ‘Siro hau n la zasiu chütuo; ciethie puo thuo lhoukelieu cülie, mu cie kenie cie süko geinu lhou kepar-u; süsie cie seu cie tsia prushülie di relie, mu khubelieko cielie di puosi cülie.

³¹Juda kinumia lhiekelieko puomie kre pesu tsutuo, mu puosi vü pekhra latuo;

³²Jerusalem nu lhiekeshüko, mu Zion kijüthou geinu lhiekelie kro puo praketuo la. Krodiko Jihova shürheiu thuo hau chüshütuo.

³³“ ‘Süla Jihovae Asiria kediu dze hakemhie puya: Puo nadi hau nu vorlie lho, theütsie puorei cielie lho, pezhü pfü di süu mhodzü phirlie lho, morei puo reketuo la terhüba pesielie lho.

³⁴Puo kevor chau, süu ze di puo latatuo; puo nadi hau nu vorlie lho, Jihova siya.

³⁵Ae nadi hau kelalieketuo la, a thuo a la mu a thekeu David la.’ ”

³⁶Sitse Jihova dielieu pra di Asiriako razhüchü nunu uko mia nyie krie puo di hiethethaepengou dukhriwa; sidi teisolie tse, uko pete kesiamo chüta.

³⁷Asiriamia kediu Senacherib tuo puo kinu vota di tsu Ninevi nu lhouta.

³⁸Siro puo kinu nu puo rhuou Nisrok rüsuo ba ru, puo nuonie Adramelek mu Sharezer unie-e zhiecha pie puo dukhriwa, di ta Ararat kijü nu vota. Mu puo nuou Esar-hadon puo sou nu kedi chüta.