Read Angami Naga Isaya 38 Bible Online

Isaya 38 - Angami Naga bible

Isaya 38

¹Süteiki Hezekia mhachülie di siata nyünuo zhüta. Amoz nuo Isaya siedzekesiu puo ki vor di puo ki, “Jihova hakemhie puya: N kiu chüpie puotou nu bawalie, kekreilamonyü no siatatuo, no shürho lalie lhote” sishü.

²Sitse Hezekia puo zie kerei pie sozhatsa va di Jihova ki cha di sie,

³“He-i Jihova, a n ki chaya, ae dietho zo, a nou pete se n tsü zo vor, n mhodzü ki vi ükecüko chü vor zo” sishü, Mu puo nou suo di kra phita.

⁴Sitse Jihova die Isaya ki vor di sie:

⁵“Vo di Hezekia ki pushücie, Jihova, n puo David Kepenuopfü hakemhie puya; A n kecha sishüte, a n mhidzü ngushüte; a cie kerepengou pie n kelhouzha bashütuo.

⁶Ae Asiria kediu dzie nunu no mu nadi hau shüphralietuo, mu nadi hau rüguolietuo.

⁷“Hauha Jihova kinu kevor n la zasiu tuo, Jihovae puo die phrakeshü mha hau chüshü zotuo.

⁸Harie, ae Ahaz vie niaki khrü kemeho-u geinu mehokeshü, niaki letazhücüu khrü bu phicha ker tsiesie lashütuo.” Sidi niakiu khrü kemeho-u gei phicha ker puo leketa de tsiesie lashü.

⁹Judako kediu Hezekia mhachü ba di shürho lakelie sie thukeshü;

¹⁰A pukeshü; a teisozha khinhieluoki a tuota morosuo beite; ae Sheol kharuko nu letatie a teicie keshako la.

¹¹A pukeshü, ae kerheimia kijü nunu Jihova ngu sa lhote; ae kijü hau nu kelhou themianuo ngu sa mota tuo tele.

¹²Tekuo kepfhemia pfheki puo tuoi, a keba kiu a kinu phepiete; pfhekedomia puo tuoi a kelhou tshüliete; puoe jüreiba geinu a betheliete; khuzhükhunhie donu no a pejüwate.

¹³A teikeso ketso kekhruo cha; puoe losha tuoi a ru pete bietshewate; khunhiekhuzhü donu no a pejüwate.

¹⁴A kitienuo morei zemvüü tuoi ruo, a mekhru tuoi meheimelo. A mhi-e pekhra mha meho puo nyiete, he-i Jihova mia bu a pesethorte; no a keyau chüliecie!

¹⁵Derei a kedipuo pulie ta? Puoe a rüchüwate, mu puoe puo thuo süu chüwate eru. A ruopfü kemezhiecü la a keze pete tate.[44]

¹⁶He-i Jihova, themia hako se di lhou tuoya, mu hako geinu a ruopfüe rhei keba zo. Oh, a chü keshürho lashü di a bu rheiliecie!

¹⁷A thenou ketsopfhü ngukelie pete a dzevi la ketho zo; derei noe kepeka kheho-u nunu a kerheiro teshü laliete, noe a kephouma pete kelhoupie n sietsa shüwate.

¹⁸Sheol n thezielie kenjü, kesiae n tshelie kenjü; kheho nu tsuketako we n dietho-u merülie kenjü zo eru.

¹⁹Rheikebau, rheikebau, ukoe n tshezhie, a thie chü keba tuoi; mia puo n kedietho-u pie u nuonuo pesishüya.

²⁰Jihovae a kelalietuo, mu we u rheichie Jihova kiu nunu puo rhü kenyi übouko se di tsali chütuo.

²¹Sitse Isayae sie; “Uko bu chiedesi da puo pie puo tichüu vashücie, siro puo shürholietuo” sishü.

²²Siro Hezekia pu sacü; “A bu Jihova kiu nu khotuoükecü zasiu kedipuo ga?” sidi ketso.