Read Angami Naga Isaya 39 Bible Online

Isaya 39 - Angami Naga bible

Isaya 39

¹Süteiki Babilon kediu Merodak-baladan, Baladan nuo-ue dieliemia ketseshü di uko bu leshü mu mhapie Hezekia ki vor, puoe Hezekia mhachü ba di vi lalie ücü sikelie la.

²Siro Hezekia puo nei di uko zelie; sidi puoe puo kinyiko, rakachü, suna mhare keviko, tier puoma kereko, puo rünyieko pete, mu puo nya kiko nu keba pete pie uko kieshü; puo kinu keba morei puo kedi nu keba mhapuorei Hezekia pie uko kie mo di khawa mo.

³Süsie Isaya siedzekesiu Hezekia kediu ki vor di sie, “Themia hako kedipuo pu ga? Siro uko kirapuonu vor ga?” ita. Sitse Hezekia lasie, “Uko rüna kepecie nu Babilon nunu a ki vorlie” sishü.

⁴Siru puoe sie, “Uko n ki nu mha kikecüpuo ngu ga?” si. Hezekia lasie, “Ukoe a ki nu keba mha peteko nguwate, a mhabou kiko nu keba a pie uko kie kemo puorei ba mote” si.

⁵Sitse Isayae Hezekia ki, “Krodiko Jihova die rünyüliecie:

⁶N kinu keba mha pete, n puonuokoe thie ketso kengu se kevor pete, pie Babilon nu votaketuo teisozhako vorzhie; mhapuorei peshashülie lho, Jihovae siya.

⁷Siro n nuo thepfu huo penuopie n ketsü huo zetatuo; mu uko bu Babilon kediu kinu u dzüpecüwa di batuo.”

⁸Sitse Hezekia Isaya ki, “Jihova die pukeshüu sü vi zo” si. Puoe lekecü, “A teiki we kezekevi mu khrukhre di ba zotuo” ikeba la.