Read Angami Naga Isaya 41 Bible Online

Isaya 41 - Angami Naga bible

Isaya 41

¹Kemekrie di a pfhe rünyüshücie, he-i dzükezha khie kijüko; themiako bu u kekuo chü kesa laliecie; uko bu phirlie, di uko bu pushüliecie; uko pete keze thecau penuo vo khe.

²Supuonie niathutsa nu kuokelie pesieshü, mu puo kiepie puo mhatho nu shüshü ga? Puo seyieko shüphrapie puo ki shü, mu kediko u phikhro nu kedewa puoe puo zhiecha se uko chüpie nyophe mhiewa, puo theü pie uko bu rügu kepruo mhiewa.

³Puo uko whuo vo mu kemichie jü zo di uko cie vo, puo phi kijü nyü kemo mhie zo di.

⁴Supuonie sietse nu seyieko kielie, di mhatho hau chüshü ga? A, Jihova, therieu, mu thelau rei chütuo.

⁵Dzükezha khie kijüko nguwate mu michiete, kijü valako perüsate, uko penuo phir mu vorte.

⁶Mia puo mia puo khruohi, mia puo mia puo ki, “Thepfulie” iphre.

⁷Mhachükesiu rükreiyakecüu chükethepfu, mu tsievütsie pie mha bie kemejukecüue rükreitsie vüyakecüu chü kethepfu, sidi sie “Vü kema peviliete” ibaya mu uko gojal pie zhie di puo bu rünielie kelho chüshüya.

⁸Derei no, Israel, a kituou Jakob, a thuo kedakelieu, Abraham yieko, a khrietho-u

⁹Kijü vala nunu a thuo n ze kevor-u mu puo ketho nunu kiekelieu, mu n ki, “Noe a kituou, ae n kedaliete mu n vawalie lho” ikeshüu;

¹⁰Michie hie, a n zetuo eru, thedzükouta hie, a n Kepenuopfü zocü la; a n chü pekuoshütuo, a n khruohishütuo, a a kemiatho dzie a zatsa pie n memhipielietuo.

¹¹Uwe, n petsouyakezha pete bu thenga mu u ziekejü chütatuo; n perhieyakecüko kemethuo mhie di katatuo.

¹²Noe n perhiekecüko pfhütuo, derei noe süko ngulie lho; n ze terhü chüyakecüko mhapuorei kemo mhietatuo.

¹³A, Jihova n Kepenuopfü zocü la, n dzie n zatsa teshü tuoya; ae n ki, “Michie hie, a n khruohishütuo,” ikeshüu zo.

¹⁴Michie hie, no Jakob zocüu, nie Israelmiako! A nie khruohishütuo, Jihova siya; nie Rhakelieue Israelko la Kemesau zo.

¹⁵Ae tsie n chüpie liedasei puo chüshütuo; methe, kesa mu puo hu kenyi puo; noe kijüthouko vü di süu bietshiewatuo, mu no kijükhruko pie shübe mhiewatuo.

¹⁶No uko heshütuo mu teikhrie thuo uko pietatuo tsiu khriewhi uko hepie cürewatuo. Sitse no Jihova nunu n neituo; Israelko la Kemesau nu no zayie chütuo.

¹⁷Kejü ketsopfhümia dzü pfhü di pfhü pejükeba ki, mu keterhüpfü puo meü sotoketa ki, a, Jihova uko pfhekhoshütuo, a, Israel Kepenuopfü uko khawa lho.

¹⁸A tsiekrie kerükrieko gei kerüko chüshütuo, mu razhako nu dzüluo khashütuo; a rayhau pie dzükhou puo chüshütuo, mu kijü keso-u pie dzüluo chüshütuo.

¹⁹A rayha nu sedar, akasia, mürtle mu Oliv seshütuo; a kijükesia nu saipres, mezapu mu tehoubo pelhou kesashütuo.

²⁰Sitse mia pete-e, Jihova dzieu thuo hau chüshü ücü, mu Israelko la Kemesau thuo süu chüshü ücü, ngu di silie, mu medoshü di lelietuo.

²¹Nie nyieu khashülie, Jihovae siya, nie zhapu dieko se vorlie, Jakob kediue siya.

²²Uko bu süko se vorlie, di kedipuo chütatie shikecü hie ki pucie. Thiedzü chüketako, hie ki pushücie, ukoe kikemhie shi, sitse hie süko dze medolietuo, sidi süko geinu mha kepar-u silietuo, moro mha vorketuoko nie hie pesishücie.

²³Hasie kedipuo vortie shi hie ki pushücie, sitse hie nieko terhuomia zoücü silietuo, mha kevi chüshüi, moro mha kesuo chüshücie, sitse hie michie mu merietatuo.

²⁴Nieko sü, ketho nu, mhapuorei mo, mu nie mhatho sü kemethuo zo; nie kedakeliemia kehoupuorei kerütse zo.

²⁵Pesotsa nu a mia puo ketshüshü, mu puo vorte, niaki thu kepartsatie nu puo theza kietuo. Puoe kezhako kedepie[45] nyoba kedekecü mhie zotuo, litho-ue linyo kedekecü mhie zotuo.

²⁶Supuonie sietse nu, mu pedzüperie pu, di u bu “Puoe ketho zo” idi pu ga? Miapuorei süu pukeshü jü, miapuorei pesishü mo, miapuorei nie dieko sishü mo.

²⁷A perie Zion ki pushüwate,[46] mu a Jerusalem ki dieliekevi pheshie puo khashü.

²⁸Derei a meho sie ru miapuorei jü; hako donu mia ketarho puorei jü, a u ketso ro, mia die kelakeshü jü.

²⁹Mo zo, uko pete mha u ketsikecü puo zo, uko mhathoko kemethuo zo; uko terhuorhiko teikhrie kemethuo zo.