Read Angami Naga Isaya 42 Bible Online

Isaya 42 - Angami Naga bible

Isaya 42

¹Harie a kituou sü, a mengupie kethau sü, a kedakelieu, a ruopfü puo ngu puo neiyakecüu, a a ruopfü pie puo gei shüwate; puoe kemezhüu se vor seyieko tsütuo.

²Puo melie morei puo pfhephra rükrieta lho morei chau nu mia bu puo pfhe silie lho;

³puoe tekhrie kepro puorei bietshewalie lho, mu mitulo tu da keba yopuo rei pemhewalie lho; puoe dietho zo di kemezhü se vorshütuo.

⁴Puoe kemezhüu pie kijü nu balie kemochie, puoe phisia morei kechazietalie lho; dzükezha khie kijüko puo kepethadie mengutuo.

⁵Ukepenuopfü Jihovae hakemhie puya, teiko chüshü di süko cie petokeshüu, kijü kelhashü di sünu keparko chükeshüu, keha khapie sügei keba themia tsü, mu ruopfü khapie sünu ketuoko tsüyakecüu;

⁶Ae Jihova, kemiatho nu a thuo n kielie, a n dzie teshülie di n se bate; ae n khapie pfhekho puo chü di themiako tsüwate, seyieko la kezie puo chü di,

⁷mhicieko mhi chü pevishütuoü, kediebou nunu kedieko ze parshütuoü, kedieki kezei nu kebako ze parshütuoü.

⁸Ae Jihova, süusü a za; a a zapuzayie pie kekreimia puorei tsüya mo, morei a ketshe pie terhuorhi tsüya mo.

⁹Harie, mha kerieko sü vorte, mu a tsie mhakesa puzhie, süko parlie kemonu, uko dze nie ki pushütuo.

¹⁰Tsali kesa puo chüpie Jihova ki shülie, kijü vala nunu puo ketshe chüshülie. Dzükezhau mu puo nu ketuo pete bu mehoshülie, dzükhie kijüko mu sünu lhou ketuoko bu rei.

¹¹Kijükesia mu puo rünako bu u pfhe piesielie; Kedar nu kelhou rünako bu rei; Sela nu kelhouko bu u kenei la kelilie, uko bu kijüthou mezüko geinu shielie.

¹²Uko bu zapuzayie pie Jihova tsülie, mu puo ketshe pie dzükezhakhie kijüko nu pushülie.

¹³Jihovae chüpahimia puo tuoi pazhü, terhümiavi puo tuoi puo noupfhü piesieshüzhie; puoe melieshüzhie, shie petoshüzhie, puo ngumvüko mhodzünu puo kekuo pekieshüzhie.

¹⁴A puotei kecha a vitho-u se vor, a kemekrie di a thuo a kethe vor, tsie we thenumia nuonuovachü tuoi melie petoshütuo, mu a thesü a notsaitatuo.

¹⁵A kijüthouko mu kijükhruko pekawatuo, mu nha pete bie pekiwatuo; a kerüko pie kijürüchütsokemoko chüwatuo, mu rüzieko bie pesowatuo.

¹⁶A mhicieko chatha ze uko si kemora votuo, uko siyakemo chako nu a uko rüguo ze votuo, a uko mhodzünu kezeiu pie kezie chüshütuo, thechü kerüdouko bie kemezhüwatuo. Mha hako a chüshütuo mu a uko khawa lho.

¹⁷Terhuoko pele mu terhuorhiko üse, “Nieko sü hie rhuo zo” ikebako we, teshü pesie lawa di uko bu thenga chütuo.

¹⁸Rünyüliecie, nieko nyievüko; mu nieko mhicieko, mehoshü di nguliecie!

¹⁹Supuo puo mhichie derei a thekeu, morei supuo nyie rüvüpie a puo ketsekeshü a dielieu tuoi ga? Supuonie mhicie pie a puo chü kemesapie kebau tuoi, morei puo mhicie pie Jihova kituou tuoi ga?

²⁰Puo mha kekra nguya, derei süko leshüya mo; puo nyieki cie, derei puo mhapfhe siya mo.

²¹Jihovae puo kemiatho-u la, puo kepethadie bie pezha mu süu bie kemeyiekeshü puo neilie.

²²Derei themia hako mia bu u vie rügu mu sekelie kro puo, uko peteko rei kheho nunu u makelie mu kedieki nunu u keviekewa phre; uko kelalieketuo miapuorei jü di mia bu u telieketuo phre, “Lashüwalie” ishüketuo jü di mia bu biesetaketuo viete.

²³Nieko donu supuonie hau gei puo nyie kedeishü, supuonie puotei vorketuou la rünyü mu puo nou khashü ta?

²⁴Supuo Jakob khapie mhakevau tsüwa, mu Israel pie sekecüko tsüwa ga? Jihova, puo gei jowaketau thuo moü me? ukoe puo chako nu tuo mo, mu puo zho-u rei ze mo.

²⁵Süla puoe puo nouyie keleu mu terhü nouyie rushü puo tsheshü; süu puo the houwa, derei puoe puoca silie mo; süu puo theshü, derei puo nou süu lelie mo.