Read Angami Naga Isaya 43 Bible Online

Isaya 43 - Angami Naga bible

Isaya 43

¹Derei tsie we Jihova hakemhie puya, n chükeshüu, he-i Jakob n rhikeshüu, he-i Israel; Michie hiecie, a n rhalieketa la; a n za se n kie, no sü a vie.

²No dzü pfü kephi ki, a n ze tuotuo; mu kerüko pfü kephi ki, süko n vuwalie lho; mu no mi nu tuokephi ki zorei n rielie lho, mu miüu n the pejüwalie lho.

³Ae Jihova n Kepenuopfü zo, Israelko la Kemesau, n kelakelieu. Ae Ijipt se n rhalie, n sounu Ethiopia[47] mu Seba khashü.

⁴Kekreilamonyü noe a mhi ki puoma re, mu therhu, tsiu a n khrieya, a n sounu themia khashü, n kerheiro ze kelituoü di seyieko khashü.

⁵Michie hiecie, a n zetuo zocü la; a niathutsa nu n nuosenuoyie se vorshütuo, mu niakratsa nu n chü kengushütuo.

⁶A pesotsako ki, “Uko khashüwalie,” sishütuo, mu pekhrotsako ki, “Kha se ba zo hie, a nuo thepfuko petse nunu ze vorlie, mu thenuko kijü vala nunu ze vorlie.

⁷A za üse kiekelie khe, a zayie la a thuo chükeshüko, a thuo rhi mu chükeshüko.”

⁸Themia u mhicie rei u mhi nyikecüko, u nyie rüvü rei u nyie kenyiko ze vorlie!

⁹Seyie pete bu vo kengulie, mu themiako bu kehoulie. Uko donu supuo hau pushülie vi, mu thiedzü vieko pekieshülie vi ga? Uko bu uko mezhü zhapu ze vorliecie, mu uko bu rünyü di, “Süu ketho” ilie.

¹⁰Nieko a zhapuko zo, Jihovae siya, tsiu kedakelieu sü a thekeu zo, nie bu silie di a pelelie, mu a sü puo zo ücü silieketuo la. A mhodzü terhuo kekrei chüshü mo, morei a sie rei puorei chüshülie lho.

¹¹A sü a, Jihova zo, a kemosie kelakelie kekrei jü.

¹²Nieko donu terhuo kekrei tuo kemo ki, a thuo pushü, kelashü mu pesishü; tsiu nieko a zhapuko zo, Jihova siya.

¹³A sü Kepenuopfü zo, mu hasie rei a sü Puo zo; a dzie nunu shüphralie kevi miapuorei jü; ae mhachüya mu supuonie süu khalieta?

¹⁴Jihova, nie Rhakelieu, Israel la Kemesau hakemhie puya: Nieko la a Babilon nu mia ketseshütuo, sidi cakhaseiko bietshewatuo, mu Chaldianko shiekeshü pie thekrü kechü chüwatuo.

¹⁵Ae Jihova, nie Kemesau, Israelko Chükeshüu, nie kediu.

¹⁶Jihova hakemhie puya, dzükezha nu cha puo chükeshüu, dzü kemeriekecü nu cha puo chükeshüu,

¹⁷gari mu gura, rüpfhünuo mu terhümiaviu ze parkeshüu; ukoe tsu zhüte, uko bielie kenjüte, uko pemhewate, mi puo tuoi ketuko pemhewate;

¹⁸Thiedzü vieko rükra hie, morei mha keweko dze le hie.

¹⁹Ae mha kesa puo chüshütuoüzhie; süu tsie the parzhie, no süu silie mo me? A rayha nu cha puo chüshütuo, mu kijükesia nu kerü chüshütuo.

²⁰Nhachüko, meseruko mu Ostrikko a rhutuo; ae rayha nu dzü khashü, kijükesia nu kerü khashü, a kedakelie themiako bu krieketuo la.

²¹a thuo a la chükeshü themiako bu a ketshe pu pesishüketuo la.

²²Sirei no we a kie mo, he-i Jakob; derei no we a mecüte, he-i Israel.

²³Noe kethe ruosuo la tekuo se vor mo, morei n nuonuoko pie a rhu mo. Ae ruosuoko pie nie pie chü mo, morei nie bu mharekethengu thenu di nie keyhu mo.

²⁴No raka pie kekhrü a tsü mo, morei ruothoko shuo pie a nei chü mo. Derei noe kephouma pie a pie chü, n kerüzhüko pie a keyhushü.

²⁵A, a sü Puo zo, a thuo a za la n kejokemouko vashüyakecüu, mu a n kephoumako rükra salie lho.

²⁶A pejoshülie, uko keze dienya nu vo khe; n nyie pushülie, sitse noe mezhüücü silietuo.

²⁷N puonuo kerieko phoumawa, mu thedo nu kethako a zho vajowa.

²⁸Süla a kemesachü nu keba kedinuoko perhuwa, a Jakob chüpie kepeka nu shüwa, mu Israel pie thetha nu shüwa.