Read Angami Naga Isaya 44 Bible Online

Isaya 44 - Angami Naga bible

Isaya 44

¹Derei tsie we rünyüliecie, he-i Jakob a kituou, Israel a puo kedakelieu!

²Jihova n chükeshüu, nuobvü nunu n rhikeshüu, mu n khruohishütuoü hakemhie puya: Michie hie, he-i Jakob, a kituou, a thuo kedakelieu Jeshurun.

³Ae keterhü kijüu gei dzü rushütuo, mu kijü keso-u gei rücüko khatsütuo; a a ruopfü rupie n nuosenuoyie gei shütuo, mu a theja khapie n yieu gei shütuo.

⁴Ukoe nha kepejo thekepar tuoi zotuo, dzü krukezhü kerükhie sopfüciekhrie tuoi zotuo.

⁵Mia puoe sie, “A Jihova vie” ituo, kekrei puoe Jakob za se puo thuo puo kietuo, sirei kekrei puoe puo dzie se “Jihova vie” idi thutuo, sidi Israel za pevielietuo.

⁶Jihova, Israelko Kediu, mu puo Rhakelieu, krodiko Jihova hakemhie puya: Ae therieu mu ae thelau; a sie terhuo kekrei jü.

⁷Supuonie a mhie ga? Uko bu süu pushülie, uko bu a mhodzünu nu süu pushü mu se parshülie. Supuonie thiedzü nu vorketuoko pushü ga? Harie chü vorketuoko uko bu hie ki pushücie.

⁸Mha prei hie, morei michieta hie; a thiedzü nu nie ki pu mu pesishüwata mo me? Nieko a zhapuko zo! A kemo terhuo kekrei ba me? Tsiekrie kekrei puorei jü, a puo rei si mo.

⁹Terhuomiarhi chüyakecüko kemethuo phre mu uko mha se u nei bayakezhako puo kemevi jü; uko zhapukoe mha ngu morei si reiya mo. Süla uko pie thenga nu shüwatuo.

¹⁰Supuonie mha kevi puorei chüyakemo terhuorhi morei mharhi rhi baya ga?

¹¹Mehoshücie, puo kerüsuoko pete bu thenga chütuo, mu mhachü kesiko themia phre zo. Uko pete bu kehoulie, uko bu siethalie, uko kedewatuo, uko bu keze thenga chütuo.

¹²Rükreiue seidurüko chüya, puoe süu pie mizhü nu shüya, puoe martul pie ketouya, puo bou kekuou pie rükreiya; puo va merütaya mu puo kekuo jütaya, puo dzü krie mo di phisiataya.

¹³Sei mistiri-ue kero puo teshü kemezhüshüya, puoe kethusei pie rhieshüya, puoe randa pie nelieya, mu puoe kompas pie zhüshüya; puoe sünu themia rhi tuoikecü puo chüshüya, süu pie ruosuoki nu pie baketuo la puo chüpie themia kezivi puo tuoishüya.

¹⁴Puoe sedarboko wilieya; morei puoe pedouko morei phriebo puo kedalie di ketsa seiboko donu puo pesepie baya. Puoe sedar puo pelhoushü di teirü bu puo vaya.

¹⁵Süsie süu mia bu seidei chütaya puoe huo pie mi chü peguoya, huopie michülie di niekhrüda rieya. Süsie puoe pie terhuo puo rhilie di süu rüsuo baya; terhuomiarhi puo rhilie di puo mhodzü nerhu tsu rüsuoya.

¹⁶Ketoupuo pie mi chüya, ketou süu geinu puoe themuo guoya, di süu cülieya tsiu puo kelhuo chülieya. Puo thuo mi peguo di sie, “Yha, a leliete, a mi nguwate!” ibaya.

¹⁷Keshatsa pie puo terhuomia puo chülieya, puo terhuomiarhiu; sidi nuketsu di süu rüsuoya; puoe süu ki cha di, “Kelashü, no sü a rhuou ze” ibaya.

¹⁸Ukoe silieya mo, morei uko lelieya mo; uko mhi bie kemawa, süla uko mha ngulie lho, mu uko bu mhalelie lho üdi uko nou bie kerübiwatakecü la.

¹⁹Miapuorei leshüya mo, morei sie, “A süko ketou puo mi nu thewate, a puo mizhü geinu rei niekhrüda rielie, a themuo rei peguo cüliete; mu a keshako pie mha kerütse puo chüwatuo me? A seide puo mhodzünu nerhu tsu rüsuotuo me?” ikecü pulieketuo mhasi morei mhale tuo mote.

²⁰Puo mige cü, bie penyakewa nou puo thuo puo chatha kekrü ze tuote, mu puo thuo puo kelalie morei sie, “A dzie a zatsa kecürü puo ba mo memu ha?” ikecü pulie si mote.

²¹Hako rükraliecie, he-i Jakob, mu Israel, noe a thekeu zo eru; a thuo n chüshü, no a thekeu zo; he-i Israel, a n rükra moketa chülie lho.

²²Ae n kejoko kimhou tuoi, mu n kephoumako mhoutsa mhiei he pejüwate, a ki la vorliecie, a n rhalieketa la.

²³Keliliecie, he-i teiko, Jihova thuo süu chüshüketa la; shieshülie, kijü kesouko; tsali chü parliecie, he-i kijü kelhouko, he-i, ketsa, mu sünu keba seibo kehoupuorei! Jihovae Jakob rhalie, tsiu Israel nu puo chü pezhashüketuo la.

²⁴Jihova, n Rhakelieu, hai di puya, nuobvü nunu n rhikeshüu hakemhie puya: A sü Jihova zo, mha pete chükeshüu, puo rübei di teiko ciepetokeshüu, kijüu kelhakeshüu;

²⁵Kecürüko thuophi pie kemethuo chüwa, mu thuophimia pie kenyamia chükewau; mhakesimia shü kerüreiwa, di uko mhasi pie kenya chükewau;

²⁶puo kituou die chü kemeteishüyakecüu, mu puo dielieko pukeshüko chü tseikeshüu; Jerusalem pu di, “Sünu themia lhoutatuo” ikeshüu, mu Juda nadiko ki, “Uko chü piesie lashütuo, tsiu uko kekako piesie lashütuo,” ikeshüu;

²⁷dzü kesouu ki, “Sotalie, a n rüko chü pesowatuo” ikeshüu.

²⁸Sairos ki, “Puo a kepfheu, mu puo a medo pete chü tseishütuo” ikeshüu, tsiu Jerusalem dze pu di, “Puo chü lalietuo” ikeshüu, mu rüsuokiu dze pu di, “N mvüdzeu dzeshütuo” ikeshüu.