Read Angami Naga Isaya 45 Bible Online

Isaya 45 - Angami Naga bible

Isaya 45

¹Jihovae puo thuo kenhekelieu, Sairos, a thuo puo dzie puo zatsa thezepielie di puo mhodzünu seyieko bie kerünuowa, mu kediko pfhenei rhuoshü, puo mhodzünu kikhako khrüshüketuo la, sidi kharuko bu khata molieketuou ki hakemhie pushü.

²A n mhodzünu votuo, di kijüthouko keva kemethawatuo, a merenyi kikhako bietshe babawatuo, mu thegi kharuko dawatuo.

³Ae kezei kinyiko pie n tsütuo, mu kepekhre kinyi keviepie kebako, sidi noe a Jihova Israel Kepenuopfü, n kiekeshüu ücü silietuo.

⁴A kituou Jakob, mu a thuo kedakelieu Israel la, a n za se di n kie, no a si morei a n za thoshü.

⁵Ae Jihova zo, mu kekrei ba mo, a sie terhuo kekrei jü. No a si morei, a n memhipielie,

⁶Mia bu niaki kethutsa nu, tsiu kisietsa nu, a sie kekrei ba mo ücü silieketuo la; Ae Jihova zo, mu kekrei ba mo.

⁷A kezieu chüshü mu kezeiu chüshüya, a hievi chüshü mu hieshie chüshüya; a Jihova, mha hako pete chükeshüu.

⁸He-i teiko, peso geinu rüshücie, tsiu teiko bu kemiatho rüshücie; kijü bu rükoshü, di kelakelie bu thusierliecie, mu süu bu kemiatho piesierliecie; A Jihovae süu chüshüwate.

⁹Puo chükeshüu ze keperhie kebau we chülietie, rünyolitho-u[48] ze keperhie kebau cie chüliete. Linyo-ue puo rhikebau ki, “No kedipuo chü ba ga?” morei “No chükeshüu puokhei jü” iya me?

¹⁰Puo puo ki, “No kedipuo penuoshü ga?” morei thenumiapfü puo ki, “No kedipuo nuonuovachü chü ba ga?” ikecümia we, ce chülietie!

¹¹Jihovae, Israelko la Kemesau, mu puo chükeshüu hakemhie puya; No a nuonuoko dze a ketsotuo me? morei a dzie mhathoko la a pethatuo me?

¹²A kijüu chüshü, mu themia chüpie puo gei shü; a dzie thuo teiko ciethashü; mu a uko kro pete ki die khashü.

¹³Ae kemiatho nunu Sairos kesoushü, mu a puo cha pete bie kemezhüshütuo; puo a nadiu chüshütuo, tsiu puoe thesu morei zhakhra le mo di, a kitako khashüwatuo, krodiko Jihovae siya.

¹⁴Jihovae hakemhie puya: Ijipt kinyi mu Ethiopia[49] lhithovie, mu themia kerükrie Sabianko, n ki vortuo di n vie chütatuo, ukoe n siemedzitatuo, ukoe thegiro bu u phapfü vor di nuketsu n kelutuo. Ukoe n ki u mezhiemelo di; “Ukepenuopfü n rübei ze ketuo zo, mu kekrei jü; puo sie terhuo kekrei jü” isituo.

¹⁵He-i Israel Kepenuopfü, Kelakelieu, no sü n thuo n kevieyakecü Kepenuopfü puo zo ketho.

¹⁶Uko peteko bu rei thenga chü di u ziekejü chüta, terhuorhi kechüko keze bouübita.

¹⁷Derei Israel we Jihova thuo kechachie kelakelieu se puo kelalie; nie bu telhetephou ketso rei thenga chü, mu nie ziekejü chülie lho.

¹⁸Jihova hakemhie puya, teiko chükeshüu (puoe Ukepenuopfü), kijüu rhishü di chükeshü (puoe süu chüpie kenhoukenyhashü mo, puoe themia bu balie kevi chüshü!) Ae Jihova, mu kekrei jü zo.

¹⁹A kijü kezei puo nu pekhre di die pu mo; A Jakob nuosenuoyie ki, “A pfhü thedo chücie!” ishü mo. A Jihova dietho puya, a puotoukecüu puya.

²⁰Nie kepekrolie di keze vorlie, penuo vorlie, nie lhiekelie seyieko! Uko kesikele jü, sei se terhuorhi kechü pie ketuoko, mu u kelalie kelho rhuo puo ki cha keba zo.

²¹Pu pesishülie, nie nyieu pushülie; uko bu keze mharhü kekielie! Supuonie thiedzünu hau pushü ga? Supuonie thiedzütho nu süu pushü ga? Süu we a, Jihova thuo mo me? A sie terhuo kekrei puorei tuo mo, kemiatho Kepenuopfü puo mu Kelakelie puo; a sie kekrei ba mo.

²²Kijü vala pete, rürei a kitsa vorlie di nie kelaliecie! Ae Kepenuopfü zo, mu kekrei jü zocü la.

²³A thuo rüseshüte, a tie nunu kemiatho nu die puo prate, die süu la vorlie lho. “Khoudza pete a ki khoutou tsutuo, meü pete rüsetuo.”

²⁴A dze haikecü putuo, kemiatho mu kekuo Jihova gei keba zo; puo gei u nei mo keba pete, puo ki vor mengatatuo.

²⁵Israel nuosenuoyie pete Jihova geinu kuolie di zayie chütuo.