Read Angami Naga Isaya 46 Bible Online

Isaya 46 - Angami Naga bible

Isaya 46

¹Bel-e nuketsu, Nebo nerhutsu di uko terhuorhiko sü khunuo mu periko gei shü; nie pfüketuo mha hako khunuo pie chü u pelho ketuo zo.

²Uko keze nuketsu, keze nerhutsu; uko thepieu kelalie kenjü di keze mia die kechü nu vota.

³A die rünyüliecie, he-i Jihova kinuko, Israel kinumia lhie se keba pete, nie penuoshü tse nunu a bu nie toupie, nuobvü nunu nie pfü vor;

⁴nie tsa nie chie ketso rei a sü puo zo, nie tsü rüpouketa ketso rei a nie pie tuo; a chüshü, mu a thuo pfütuo, a toupietuo mu a kelashütuo.

⁵Nie supuo pie a mhieü, mu a ze ketou, tsiu a ze kemejü di hienie rhi kemhieü ta?

⁶Likhuo nunu suna kha seshü, mu rakachü pie roshükhou nunu mejükeshüko, uko suna rükreimia puo zhakhrülie, puoe terhuo puo chükeshüu, sidi ukoe tetsu süu rüsuoya.

⁷Uko u bouka geinu süu toupie, ukoe puo pie puotha nu shü, sitse süu sünu thata; süu puo tha nunu melelie lho. Mia puo kieshü rei puoe khoya mo, morei puo kemezhiekecü nunu miapuorei kelalieya mo.

⁸Hau rükrashü, mu leshücie, süu pie nie nou ki la vorlie, nie vajokewako.

⁹Kerieko vieko rükrashücie; ae Kepenuopfü zo mu kekreimia puorei jücü la; ae Kepenuopfü, mu miapuorei a kemhie jü,

¹⁰Sietsenu thelau dze pushü, mu kerieki nu mha vor moluokecüko dze pu di, “A mharhüu tha zotuo, mu a rhükelieu chüshü zotuo” ikeshüu.

¹¹Niathutsa nu mha tekecü pera puo kieya, rüna kepetse puo nunu a mharhüu la kevor themiau. A pushüwate, mu a süu chü vorshütuo; a raliete, mu a süu chü zotuo.

¹²A die rünyüliecie, nie nou kekhrüko, nie shüphralieketuo nunu pecie tuoketako;

¹³A shüphrakelieu se penuo vorzhie, süu pecie mote, mu a kelakelie telhe lhote; a a kelakelie pie Zion nu shütuo, a zapuzayieu Israel la.