Read Angami Naga Isaya 48 Bible Online

Isaya 48 - Angami Naga bible

Isaya 48

¹Hau rünyüshücie, he-i Jakob kinuko, Israel za se u kieyakecüko, Juda va[50] nunu keparko; ketho mu kemezhü nunu mo di Jihova za se rüse, tsiu Israelko Kepenuopfü kieyakecüko.

²Nadi kemesau za se uko thuo uko kieya, tsiu uko thuo Israel Kepenuopfü gei bayacü la; puo zae krodiko Jihova we.

³Mha kerieko a thiedzütho nu pushüte, uko a tie nunu pa mu a thuo süko pu pesishü, sitse a va puo nu süko chüshü ru uko parlie.

⁴Kekreilamonyü ae no kenyietokecü si, mu n vo nyhie thegi se chü tsiu n teikhie mese se kechü si.

⁵A thiedzütho nu süko se n ki pushü, mha süko vorketuo a se n ki pushü, n bu, “A rhuorhi thuo chüshü, ke pie kechü, mu lhokelie terhuorhiko thuo die khashü” sitalie kelho la.

⁶No sishüte, tsie hako pete ngushü; sidi no pushü lho me? Tsie yawinu a nie bu mha kesa rünyütuo, no si moluokecü kevie pie ketuoko.

⁷Tsie we uko chüliete, pecha moluo; thie mhodzü no uko dze si mo zoluo, n bu “A süko site” idi putalie kelho la.

⁸No mhakipuorei sishü mo, no mhakipuorei si tuo mo, thiedzütho nu n nyie ciepar mo zo. No sü cürü se di mhachü meciekecü, mu n penuoshü tsenu n üse miakepetsou-u ükecü a sikecü la.

⁹A zau la a nouyieu shükhreshühie, a thetsheu la n gei a kethe, a n dathewa molieketuo la.

¹⁰Harie, a n chü kemesawate, derei rakachü kemhie di mo, a kemezhiekecü miu nunu n the mehowate,

¹¹A thuo a zau la, a thuo a zau la, a süu chüshü, kekreilamonyü kiüdi a zau bieperhuwatuo mu? A zapuzayieu pie kekreimia tsülie lho.

¹²A die rünyüliecie, he-i Jakob, mu Israel, a puo kiekelieu, ae puowe, ae therieu mu thelau,

¹³A dzie thuo kijüu mvüdzeshü, mu a dzie a zatsa pie teiko kelhashü; a uko kiekeshü ki, ukoe a mhodzü tsesei-i thalieya.

¹⁴Nieko pete, kengulie, di rünyülie! Uko donu supuonie hako pushü ga? Jihovae puo khrieya; puoe Babilon gei puo keleu chüshütuo, mu puo boue Chaldianko petsoutuo.

¹⁵A, a thuo, pushü mu puo kie, a puo ze vor, mu puoe puo cha nu vikehielietuo.

¹⁶A penuo vorlie, hau rünyülie! Therie nu zorei a pekhre di die pu mo, tse nu a tuote. Siro tsie Jihova, Ukepenuopfüe a mu puo ruopfü ketseshüte.

¹⁷Jihova, nie Rhakelieu, Israelko la Kemesau hakemhie puya: Ae Jihova nie Kepenuopfü, nie dzevi la nie pethayakezhau, nie vo kezhü nu nie cha thashüyakecüu.

¹⁸He-i, nieko a die khakeshüko rünyülieücü we! Sitse nie kruokelie-e kenei puo tuoilietuo, mu nie vikelie-e dzükezha rüpfhü tuoilietuo;

¹⁹nie tsu niezüe theshünyo tuoilietuo muru, mu nie nuosenuoyie-e theshünyo tuoilietuo muru; mhakipuorei a mhodzünu uko za dathe morei pekawalie lho muru.

²⁰Babilon nunu patacie, Chaldian nunu tatacie, keneipfü shie di hau pushülie; hau keyiepie kijü kela nu shülie; di, “Jihovae puo kituou Jakob rhaliete!” silie.

²¹Puoe uko ze kijükesia nu kevo ki uko terhü mo; puo uko la ketsie geinu dzü bu kru par; puo ketsieu biekhoshü ru dzü rüluo par.

²²Jihova hakemhie puya, “Kerüzhüko la we, noune jü.”