Read Angami Naga Isaya 49 Bible Online

Isaya 49 - Angami Naga bible

Isaya 49

¹A pfhe rünyüliecie, he-i, dzükhie kijüko, rünyüliecie, nie kepetse nu themiako! Jihovae a penuolie kemo nu a kielie, a zuo va nu ketuo nu puo a za thoshü.

²Puoe a tie chüpie zhiecha puoü kevi puo mhieshü; puo dzieu khrükhro nu puo a kevielie; puoe a pie vaikecü theütsie chüshü, puoe a pie puo theütsiebou nu keviewa.

³Sidi puoe a ki, “No a kituou, Israel, n geinu a chü pezhashüketuou zo” si.

⁴Derei a sie, “A kemethuo mezhie chü, a kemethuo kemeruo nunu a kekuo pevowate; sirei a nyieu sü Jihova gei ba, mu a zhakhra sü Ukepenuopfü ki ba zo” si.

⁵Siro tsie Jihovae puya, Jakob ze puo ki la vortuoü mu Israel kengupie puo ki shülietuoü di, nuobvü nunu puo kituou chütuoü di a chükelieu, Jihova mhingu ki a pie ketherhushüta zocü la, mu a Kepenuopfü a kekuou chüte.

⁶Puo pucü, “Jakob seyieko piesie laketuo mu Israel lhiekelieko ze lalieketuo la, n bu a kituou chükecü mha kecü puo zo; a kelakelie bu kijü vala tsolieketuo la, ae n pie seyieko kezie puo chütuo.”

⁷Jihova, Israel Rhakelieu mu puo Kemesau, seyieko puo kemecüu, puo rütse phikecüu, mha kekhakezhako thekeu ki hakemhie puya; “Jihova, kedietho-u, Israel la Kemesau, nie kedakelieu la, kedikoe ngu di siethalietuo, kedinuoko rei u thuo rünuotsu n kelutuo.”

⁸Jihova hakemhie puya: Puotei kevi puo nu a n die kelashü, kelakelie teisozha nhie a n khruohishü; kijü bu balieketuo, mu raketa thekau kezashüketuo la, a n se balie mu n bu kepfhekhokecü puo chüpie themiako kishü.

⁹Sidi kedieko ki, “Parlie!” ishü, kezeinu kebako ki, “Par mhingu chüshülie” ishü. Ukoe cha nu mhacütuo, methuokecü kijü kerükrieko nu uko nha pfhü cütuo;

¹⁰Ukoe terhü merülie lho, teikhrie kele morei niaki uko bie pesuowalie lho, uko ngumezhiekeshüu thuo uko cha thataketuo la, mu puoe dzüluo kenyira uko ze votuo.

¹¹Siro a kijüthou pete pie cha chüwatuo, mu a chaüko chü kerükriewatuo.

¹²Legei, hako kepecie nunu vortuo, mu legei, hako pesotsa mu kisietsa nu, tsiu hako Sinim kijü nunu.

¹³Kenei la kelilie, he-i teiko, mu nie neilie, he-i kijüu; tsali chüphra parliecie, he-i kijüthouko! Jihova thuo puo themiako nou thupeluowate, mu puo themia kemezhiekecüko ngumezhie zotuo eru.

¹⁴Derei Zion-e “Jihova a khawate, a Jihova a rükra mote” iba.

¹⁵Thenumiae puo nuo kenuyo rükra mota, morei puo noupranuoyo ngumezhie motalie vi me? Uko zowe rükra motalie vi, derei a we n rükra motalie lho zo.

¹⁶Harie, a n rhipie a dziezhü nu shüliete, n dahouko a mhodzüki ba seiya.

¹⁷Nie ki kechükoe mhai vortuo,[51] mu n pekakewako n kinu tuo patazhie,

¹⁸Ngosie lutsahatsa mehoshücie; uko pete kengulie, uko n ki vorzhie. Jihovae pukecü, a rhei tuoyakezha tuoi, no uko pie rütsonyie kemhie di setuo, yasapfü tuoi no uko pie n gei shütuo.

¹⁹N phe kaketa mu raketako tsiu n kijü vakewako, tsie we n themiako la merethorta toutuo, mu n mezukelieko pecietatuo.

²⁰thenoukesuo teiki nu n nuo penuokelieko n kesi kinu, “Thechü a la merethorte; a bu balieketuo la thechü khashücie” situo.

²¹Sitse no n nou nu, “Supuonie hako penuoshü a tsü ga? A a nuonuo pesiawa mu nuojü chüta, a whuowa mu a vawata, ru supuonie hako theke siershü ga? A rübei peshashüe, ru hako kirapuonu vor ga?” si ba.

²²Niepuu Ukepenuopfü hakemhie puya: A a dzie yhapie seyieko gei shü mhaishütuo, mu themiako ki a zasiu piesieshütuo; mu ukoe uko merü geinu n nuo thepfuko pie vortuo, tsiu n nuo thenuko uko bouka geinu pie vortuo.

²³Kedimia bu n puo n thekekelieu chütuo, mu kedipfü bu n thekekeshüpfü chütuo, uko zie zerepfü di nuketsu n kelutuo, mu n phizhü gei nyophe meyotuo. Sitse noe a Jihova zo ücü silietuo; a khre merüyakecüko bu thenga chülie lho.

²⁴Kekuomia dzie nunu puo chüteu sesetalie vi me? morei u zho kesuomia dzie nunu kedieko kelalie vi me?

²⁵Derei Jihova hakemhie puya: Kekuou diemiako rei kela lalietuo, mu puo zho kesuou dzie nunu telieketau kelalietuo; a thuo a perhiekecüko perhietuo, mu a n nuonuoko kelalieketuo la.

²⁶A n neketekecüko bu u thuo u chü cütuo, mu zu kekrie tuoi u thuo u zie krie mezetuo. Sitse chüüphou pete ae Jihova n Kelakelieu, mu n Rhakelieu, Jakob Kekuou ücü silietuo.