Read Angami Naga Isaya 5 Bible Online

Isaya 5 - Angami Naga bible

Isaya 5

¹A bu a neiu la puo khubelie dze kekhrie tsali puo chüshü thie: A neiu sü kijü kro sekecü kijüthou puo gei khubelie puo ba.

²Puoe süu phieshülie di ketsieko pawa, sidi khube kevitho leishü; puoe süu metsuo nu rükhouba puo chüshü, mu sünu khube zutse puo hoshü; puoe sünu khubesi vükeshü merü ba, derei süu nha khubesi vüta.

³Süla tsie, Jerusalem nu kelhouko mu Juda themiako, a mu a khubelie hienie donu theca chüshücie.

⁴A khubelieu la a chü tsokemo mha kicüpuo chü sashü zhü ga? A puo bu khubesi vükeshü merü keba ki, puo kiüdi nha khubesi vüshü ga?

⁵Mu a tsie a khubelieu gei chüshüketuou pushütuo. A puo cakhako biewatuo, sidi süu chü pejüwatuo; puo dahou biemewatuo, sidi süu kedewatuo.

⁶A puo bie pekapemhewatuo; puocoko be motatuo, morei kejü pie chü sa motatuo, sidi huphienuo mu zohuko lhou sietuo; puo kimhouko ki diekhashü di uko bu teirü pie puo va motatuo.

⁷Krodiko Jihova khubelieu sü Israel kikruko zokecü la, mu Judamia sü puo mhalei puo neiko, puoe kethocau merü, derei thezie kepekru ngulie; kemiatho merü sie, derei kekra pfhe silie!

⁸He-i, nieko ki chüpie ki sa, lie pie lie sasa vo, nie rübei sie kekreimia la thechü ba moketa ketso, mu n rübei di kijü metsuo nu baketuou!

⁹Krodiko Jihovae a kesi kinu rüseshü: Ki kekra thedzükezei chüta zotuo, ki zha mu zivikecüko, themia puo nu lhou motatuo.

¹⁰Khubelie tsa ker pie puo rübei vütuo, mu tsia chü puo cieshü ro khodei puo[3] rübei vütuo.

¹¹Ce, zu kekuo krie kenyü la khise sie ziyakecüko, thevatie ketso zu bu u the bayakecüko,

¹²Thehe thehieko nu nyarübou mu kithar, kekreikecüko mu luoü mu zu seya, derei ukoe Jihova mhathoko ü mha üya mo, morei puo dzie mhatho mehoya mo!

¹³Süla a themiako kesikele jü di mia die chü tuote; uko donu therhuko khesiazhie, mu uko miakrau terhü tuote.

¹⁴Süla Sheol bu puome mehuo, mu puotie bu meyathorliete; di Jerusalem pehüko[4] mu krodiko, puo krodi mu puo gei u neikeba pete keze sünu lete.

¹⁵Themia bu nuketsute, themia pete bie kerünuowate, mu kerüzhakecüko mhi bu tosielie mote.

¹⁶Derei Krodiko Jihova kethocau geinu rükrieliete, mu Ukepenuopfü Kemesau kemiatho nu puo thuo mesapie mia kietuo.

¹⁷Sitse tekuokoe u zho nu tuoi di nha cütuo, mu tekuonuo kecüko phe raketako nu mha pfhü cütuo.

¹⁸Ce, kecürü ro pie kejo teshüyakecüko, gari ro mhie di kephouma teshüyakecüko

¹⁹Ukoe sie, “Puo bu rükrilie, puo bu puo mhatho chü pezilie di u bu mehoshüthie; Israel Kemesau mharhüu bu chü tsei rükrishü di u bu süu sishüthie!” siya.

²⁰Ce, nie kesuo ü viü mu kevi ü suo üyakecüko, kezeiu pie kezie ü mu kezieu pie kezei ü, kepfhü ü kemou ü mu kemou ü kepfhü üyakezhako!

²¹Ce, nie nie thuo nie mhiki mhasi üyakezhako, mu nie thuo nie mhingu ki mecie üyakezhako!

²²Ce, zu kekrie nu kethepfumia kechüko, zu kekuo pie kereikecü nu miavimia chüyakecüko,

²³theso la kejomia üse mezhü üyakezhako, mu kemezhümia mezhüu pejüwayakezhako!

²⁴Süla mi-e rügu the pejükezha mhie, mu nha kesiako miü nu jütayakezha tuoi, uko mie zorei cietatuo, mu uko pouko zorei nyophe mhietatuo; ukoe krodiko Jihova zho-u khawate, mu Israel Kemesau die rütseketa la.

²⁵Süla Jihova nouyie puo themiako gei tusieta, sidi puo dzie yhase uko perhie mu uko vüshü; kijüthouko rünieta, mu uko kesiamiako chadi nu nyorhu mhie zhüta. Hi zoshierei puo nouyie rüdita mo mu tsie rei puo dzie yhapie ba zo.

²⁶Puoe seyie puo la ratsa nu zasi puo piesieshütuo, mu kijü kela nunu mesupie süu kieshütuo. Sitse harie, süko mhai mu rhüi vorlie!

²⁷Miapuorei mezieta mo, miapuorei puo phi mesü mo, miapuorei rüngu morei zeta mo, pfhephrie puorei rünyhuta mo, phikou phako puorei teta mo;

²⁸uko theütsieko methe, u theüko ga phre pie, u gura mouko ketsie thega tuoi, mu uko garithuoko khriewhi mhie.

²⁹uko mehokeshü losha kemhie, losha nuonuo tuoi uko meho; uko nge di u chüte te, uko süu pietata, mu miapuorei sü kela lalie kenjüta.

³⁰Sünhie ukoe süu gei meho batuo, dzükezha puo pfhe kechü mhiei. Mu mhanuü miapuoe kijü mehoshü ro, kezei mu kemezhiekecü rübei; mu kimhouko bu kezieu va pezeikewa ngutuo.