Read Angami Naga Isaya 50 Bible Online

Isaya 50 - Angami Naga bible

Isaya 50

¹Jihova hakemhie puya: N zuo vakewa leshüu, puo vakewa leshüu kirapuo ba ga? Morei a supuo pu pfüzhü di süu ki n zewa ga? Mo, kerüzhüko la n zekewa zo, mu n kejo la n zuo vakewa zo.

²Kiüdi a kevor ki miapuorei ba mo ga? Kiüdi a kiekeshü ki miapuorei pfhekho mo ga? A dzie dzüta di süu rhalie kenjüte me? Morei shüphralieketuo a kekuo jüte me? A pfhükeshü geinu a dzükezha chü pesowa, a kerüko chüpie kijükesia chüwa; uko khuoko dzü kejü la mena, mu terhü di siata.[52]

³A ketei pie teiko pedzieshüya, mu gakhropfhe pie uko kewhe chüshüya.

⁴Dieca puo pie mezieketau va perheikelie do silieketuo la, Niepuu Ukepenuopfüe kepethamia meü pie a tsüshü.[53] Teisoduü puoe a kesou, a nyie va perho di a bu pethalieketamia tuoi rünyülieketuo la.

⁵Niepuu Ukepenuopfü a nyie bu cieparte, mu a mia dieze mota mo, a rürei pesieta mo.

⁶Ae rünou pie a kevüko tsü, mu a dzo pie a tiemie kepieko tsü, thenga mu mhitsiepie vakecü nunu a zie kevieta mo.

⁷Niepuu Ukepenuopfüe a khruohiya; süla a ziekejü chüta mo, süla a a ziepie tsiekhrü puo tuoiliete, mu a thenga chütalie kelho si ba;

⁸a yapiekecüu penuote. Supuo a ze keperhie ta? Úko keze thalie khe. A ngumvüu supuo ga? Uko bu a ze kesecie.

⁹Süue Niepuu Ukepenuopfü a kekhruohiu; supuonie a jo üdi pulie ta? Uko pete pfhe puo tuoi suotatuo, shülhe thuo uko cüwatuo.

¹⁰Supuonie Jihova prei mu puo kituou dieze, kezei nu tuo, mu kezie jü, derei Jihova zau pele mu puo Ukepenuopfü khremerüyakecüu nieko donu ba ga?

¹¹Derei nie mi petushüyakecü pete, mitu-u petushüyakecü pete.[54] Nie mi kezieu nu tuoliecie, mu nie mituko nu tuoliecie! Noe a dzie nunu hau ngulietuo: nie nousuo nu zhütuo.