Read Angami Naga Isaya 51 Bible Online

Isaya 51 - Angami Naga bible

Isaya 51

¹A pfhe rünyülie, nie kemiatho whuo ketuou, nie Jihova pfhüyakecüko. Puo geinu nie phrokelie tsieu meholie, mu puo nunu nie hokelie tsiekrie meholie.

²Abraham n puo, mu Sara n penuokeshüpfü meholie; a puo kiekelie ki puo puo rübei zocü la, derei a japie puo tsü di puo chü pekrashü.

³Jihovae Zion thupeluoketuo la; puoe puo kijü vakewa pete thupeluoshütuo, mu puo rayha chüpie Eden tuoishütuo, puo kijükesia chüpie Jihova zieu tuoishütuo; puo geinu kenei mu thedzükezie ngulietuo, kethezie khakeshü mu tsali pfheü ngulietuo.

⁴A themiako, a die rünyüliecie, mu a seyieko, nie nyie kedeipie a tsücie; kepetha a kinu patuo, mu themiako va pezieketuo la, a kethoca a kinu pa zotie eru.

⁵A shüphrakelie se mhai vor penuoshütuo, a kelakelie tuo prate mu a bou thuo themiako kekhatuo, dzükhie kijüko a pfhe ba, mu uko a bou merü ba.

⁶Nie tosie teiko mehoshücie, mu kijü pekhrotsa mehoshücie; teikoe mikhu tuoi jütatuo, mu kijüue pfhe tuoi dzie pesuowatuo, mu puo nu kebako teizie tuoi siatatuocü la, derei a kelakelie we kechachie la batuo, mu a shüphrakelieu mhakipuorei puo kela chülie lho.

⁷A pfhe rünyüliecie, nie kemiatho siyakecüko, nie a kepethadie nie nou bayakecüko; mia u kerhiekecü prei hiecie, mu mia u kerhiekecü la thedzükouta hie.

⁸Pfhe puo tuoi shülhe uko cüwatuo, mu chümie tuoi zope thuo uko cüwatuocü la; derei a shüphrakeshü we kechachie latuo, mu a kelakelie we thephou pete la zo.

⁹Colie, colie, kekuo selie, he-i Jihova bouu! Colie, thiedzü tuoi, thiedzütho phouko tuoi! Rahab dathe babawakecüu, kesüdi zekeshüu no mo üme?

¹⁰Dzükezha bie pesokewau; dzükesouthoko pesokewau; rhalieketako bu tuo philieketuo la dzükezha kesouko pie cha chükewau no moü me?

¹¹Süla Jihova rhakelieu vortuo, mu keli di Zion gei vortuo, kechachie kenei uko tsü gei batuo, uko kenei mu thedzükezie ngulietuo; siro nousuo mu meheimelokecü tatatuo.

¹²N nou thupeluoyakecüu sü a, a zowe; di siro themia sia touketuo puo; mu themianuo nha tuoi rüwitayakezha puo prei ba memu.

¹³No Jihova n chükeshüu, teiko kelhakeshüu mu kijü mvüdzeko dzekeshüu rükra mote. Noe mia neketekecüu mha pekatuoü kesie noupfhüu la zhate michie baya. Derei mia neketekecüu noupfhü kirapuo ba ga?

¹⁴Mia u pesekezhako kha pezishüwatuo; ukoe siata lho mu kheho-u nu letalie lho, morei puoca puova jütalie lho.

¹⁵Ae Jihova nie Kepenuopfü, dzükezhako kerhieshü di uko bu puo pfhe kemerie chü kebau zocü la, puo za sü krodiko Jihova zo.

¹⁶A a dieko pie n tie nu shüwate, mu n pie a dzie khrüu nu kevieliete, teiko kelhashü, mu kijü mvüdzeko dzeshü, sidi Zion ki, “No sü a themia zo” ishü.

¹⁷Nie colie, nie colie! Siethalie, he-i Jerusalem, Jihova dzie nunu puo noupfhü hieu krielieketapfü, no pevüvütayakecü hieu krie kemesalieketau.

¹⁸Puoe penuokeshü nuonuoko donu miapuorei puo chathakeshü jü; puo nuo theke kesierko donu miapuorei puo dzie teshüketuo jü.

¹⁹Mha hanieha n gei vorte; supuo n ze thenousuoshü ta? Mhakeva mu kepeka, pekriekecü mu zhiecha nu supuonie n nou thupeluolie ta?

²⁰N nuonuoko phisiate, uko chabo pete nu thelou jal nu mapfükezhü tuoi zhüte; Jihova noupfhüu mu n Kepenuopfü kerhiekecüu bu uko ketshu chüte.

²¹Süla hau rünyüliecie, nie rüzapfükezhüko, nie meze ba derei zu la mo;

²²Jihova n Kekuou, n Kepenuopfü, themia zhapieyakecüu hakemhie puya: Harie, a n dzie nunu pevüvükecü hieu pieliete; a noupfhü hieu n bu krie salie lhote.

²³Siro a süu pie nie kepechüko dzienu shüwatuo, süko ki, “Nuketsulie, hie bu n mho gei tuoketuo la” ikebako; mu n chie pie kijü kemhie mu cha kemhie di uko bu tuo volieketuo la.