Read Angami Naga Isaya 52 Bible Online

Isaya 52 - Angami Naga bible

Isaya 52

¹Colie, colie, n kekuou selie, he-i Zion! N pfhenei keziviko selie; he-i Jerusalem, kemesa nadiu; zhürekemoko mu mesa kemoko n ki vor salie lhotacü la.

²Nyophe n kevako kesouwalie, sielie[55], he-i Jerusalem kedieu; n vo kepha roko phreiwalie, he-i Zion nuo kediepfü!

³Jihovae hakemhie puya: Puoma jü di nie zewa, mu raka sa mo di nie rha lalietuo.

⁴Niepuu, Ukepenuopfüe hakemhie puyacü la. Thiedzütho a themiako chazoumia chü di Ijipt nu lhoutuoü tsu; Asiria rei kemethuo nu uko peseta.

⁵Süla Jihova puya, a tsie kedipuo chü ba di kemethuo nunu mia bu a themiako tezeta ga? Uko kezhako kra baya mu zhate a zapie kethese baya. Jihovae siya.

⁶Süla a themiako bu a za situo, süla sünhie die pukeshüu A zocü uko bu situo; A haki ba zo.

⁷Kezekevi pu pesikeshü dielieko phi kijüthouko gei ketuo kide zivi shi! Dieliekevi se kevor-u, kelakelie pu pesikeshüu, Zion ki, “N Kepenuopfü di ba” ikeshüu

⁸Rünyülie, n rükhouko u pfhe chüzhie, uko keze u nei di kelizhie; ukoe Jihova Zion nu la vorketa keze mhotsou ngu batacü la.

⁹Nie Jerusalem nu thechü raketako, keze tsali chü sierliecie; Jihova puo themiako thupeluoyacü la, puoe Jerusalem rhaliete.

¹⁰Jihova seyieko pete mhingu chü puo bou kemesau hieshüwate, mu kijü vala pete bu Ukepenuopfü kelakelie ngutuo.

¹¹Tuotalie, tuotalie, cü nunu patalie! mha mesakemo puo rei bie hie; süko donunu patalie, nie thuo nie chü kemesalie, nie Jihova khouühie pieyakecüko.

¹²Nie bu rükri zo di patuoü ba mo, mu nie theta chü di patieya mocü la; Jihova nie mhodzü tuotuo, mu Israelko Kepenuopfü nie sietsa kepfheu chütuo.

¹³Harie, a kituou we vikehielietuo, puo chü ketherhu mu pesieshütuo, mu pie kerükrie seshütuo.

¹⁴Mia kekra puo ngu u ngokecü tuoi, puorhi krei pie themia mhie mota zo, mu puorhi themia rhi mota zo.

¹⁵Siro puoe seyie kekra kedeshütuo, kedimia puo ngu di tiematatuo; ukoe uko ki pushü kemoko ngutuocü la, mu ukoe thiedzü pemhopemhi kemoko lelietuo.