Read Angami Naga Isaya 53 Bible Online

Isaya 53 - Angami Naga bible

Isaya 53

¹Supuonie hie kesikenguko pelelie ga? Siro Jihova boue supuo pengushü ga?

²Puoe puo mhodzünu nha nuonuo tuoi lhou sier, mu kijü keso nu nhamie puo tuoi par; puorhi morei puowe nyi di u bu ngu mehoukecü puo gei tuo mo, mu puo kenguu nu puo mehoulieketuo jü.

³Mia puo mecü mu puo melie; kemezhiekecümia puo chü mu kelhokemezie si; mu mia puo ngu ro u zie kevietayakecü puo tuoi mia puo pie kethese, mu we zorei puo le ketherhu mo.

⁴Ketho zo, puoe u mezhieko lhoupfülieta zo, mu u kechükenyüko pfüliete; sizoürei we puoü kere dzükelie, Ukepenuopfü thuo puo vüshü mu puo pechüpenyükewa puo tuoi di le.

⁵Derei u kejokemouko la puo bu rüza pfülie, u kerüzhüko la puo kradawa, kepechü pie puo gei keshü la u bu shürholie, mu rüzapfüko la u chü kemenelie.

⁶U pete tekuo tuoi yotuote, u pete cha u tse va phrete, mu u kesuoko pete Jihova pie puo gei shüshüte.

⁷Puo pesüpemvü, mu puo pechüpenyü, sirei puo tiega rei mo; tekuonuo ze kedukhri nu kevo tuoi, mu tekuoe puo mie kebeko mhodzü meümokecü tuoi, puo tiega rei mo zo.

⁸Kethocau bie kethotsüwa di puo zeta. Supuonie puo gei kiütatuo shicü lelie vi ta? Kekreilamonyü kerheiko kijü nunu puo dawa, mu a themiako kejo la puo vüwate.

⁹Ukoe puo kekhruchü pie kerüzhüko ze kerhe mu kenyiko ze puo mekhru chü, puoe zhosuo tho puorei chü mo zorei, mu puo tie nu mia kese tuo mo zorei.

¹⁰Sizorei puo pechü puo vüketuo Jihova medota. No puo kerheiro pie kephouma la khakeshü ki, puoe puo nuosenuoyie ngutuo, sidi puo teisozha chü pechashütuo; puo geinu Jihova medo-u rüshülietuo.

¹¹Kemezhiekeshü geinu puo kezieu ngutuo; puo kesikele geinu puo kenei ngulietuo. Kemiatho-u, a kituou, kemiathomia kekra chüshütuo, mu puoe uko kejokemouko pfülietuo.

¹²Süla ae puo pie kezhamia mhaza nu shütuo, mu puoe kekuomia ze mha vakelieko kezatuo; kekreilamonyü puoe puo khapie kesia nu shüshü, mu kejokemouko sa puo phrülie; sirei puo mia kekra kephouma pfülie, mu kejokemouko la die pu.