Read Angami Naga Isaya 54 Bible Online

Isaya 54 - Angami Naga bible

Isaya 54

¹Keliliecie, he-i nuo penuokemo nuojüpfü; tsali chü parlie di shie petoliecie, no nuonuovachü chü kemopfü! Puo rübei kebapfü nuonuo we nyhüketapfü nuonuo ki krakuotuo eru, Jihova siya.

²N pfheki pheu chü pezhalie, mu kebachü nu keya pfhe kelhashülie; ketheta hie; n roko bie pechalie, mu n seiseko bie kemeteilie.

³Noe thezatsa mu thevitsa keza patuocü la, mu n nuosenuoyie seyieko pie u vie chülie di rüna vakewako nu lhoutuo.

⁴Michie hie, n bu mengatalie lhocü la; n chamezieta hie, n bu thengachütalie lhocü la; noe n khriesarüü ki ngau rükra motatie eru, mu sami teiki n thethau no rükra salie lho.

⁵N Chükeshüue n nupfu zocü la, Puo zae krodiko Jihova we, Israelko la Kemesaue n Rhakelieu, puo üse kijü pete Kepenuopfü ütuo.

⁶Vawata di puo nou kemezhie kebapfü puo tuoi, khriesamia puo kimia chü di puo va lawaketapfü tuoi Jihova n kieliete, nie Kepenuopfü siya.

⁷Doyopuo la a n khawa, derei ngukemezhie kezha se a n pfhükengu lalietuo.

⁸Tshuziekecü noupfhü nunu va yopuo n kinu a zie kevielie, derei kechachie kekhrie se a n ngumezhietuo, Jihova, n Rhakelieue siya.

⁹Hau a la Noah teiki tuoituo: Ae rüse di Noah dzüko bu kijü mho la sielie lhoükeshü tuoi, a n gei a nei mo mu n kerhie lalie lho üdi rüsewate.

¹⁰Kijüthoukoe tuotalie vi, mu kjükhruko rüditalie vi, derei a kekhrie rüdi kemo-uwe n kinu tuotalie lho, mu a vitho pfhekho-u setalie lho, Jihova n ngumezhiekeshüue siya.

¹¹He-i pechüpenyü seketuou, khriedi puo he se, mu thenouluolie kemo-u, a n tsieko antimoni tsie pie pfhetuo, mu n mvüdzeko safir pie dzeshütuoüzhie.

¹²A n kikruko rubiko se chütuo, n careko jewelko pie chütuo, mu n dahouko pete puoma kere tsieko pie pfhetuo.

¹³Jihova thuo n nuonuoko pete pethashütuo, mu n nuonuoko vikehie philietuo.

¹⁴Kemiatho nu n sesieshütuo; mia kepeseu n kinu pecietatuo, no michielie lhokecü la; mu kemeriekecü, süu n kinu pecietaketuo la.

¹⁵Huomianie kegei pesie ro, a kinu mo ho; kehoupuorei n ze kegei sie rei n la tetsutatuo.

¹⁶Harie ae rükreiu chüshü, puoe thezhü miu mheshüya, sidi rünyie se morokesuo touu chüshüya; ae mha bie pesuoketuo la mha kevau rei chüshü.

¹⁷Se n perhietuoü di chükeshü rünyie puorei vilie kenjü, mu dienya nu n ze kenya kesie meü pete noe ti pejüwatuo. Hau Jihova kituoko kayieuwe, mu a kinu uko mezhü thokeshüuwe, Jihovae siya.