Read Angami Naga Isaya 56 Bible Online

Isaya 56 - Angami Naga bible

Isaya 56

¹Jihova hakemhie puya: Kethoca se balie, mu mezhü ücüu chülie, pecha mo di a kelakelie vortuo, mu a shüphrakelieu pengushütuocü la.

²Hau chüüzekezhamia, hau theze tsapie bakelieu, sabat zha ze bakelieu, mu süu zhase kemo-u, mu mha kesuokechü nunu puo kethekelieu thejakepfümia zo.

³Jihova chüüsaketa rüso-u bu hakemhie pu hie, “Jihovae puo themiako kinu a kelhi touwa” si hie, mu dzücüu bu rei, “A sü seisia ze” ita hie.

⁴Jihova hakemhie puya: A sabat pie bayakezha dzücümia, a nei a medo-u kedayakecümia mu a dietseidiekho-u se tsakebamia ki,

⁵A a kinu mu a cahou nu n nuonuo thenu thepfu ki vikuokecü, rükraketuo vie puo mu theza kevi puo pie tsütuo; ae dathewa kelho kechachie za puo pie uko tsütuo.

⁶Siro chazoumia u thuo Jihova, lie chü mu puo zau khrie, mu puo kituo chü, sabat ze keba pete mu süu zhase mo, tsiu a dietseidiekho-u se tsatuoü di Jihova chüüsaketa khe.

⁷A hako ze di a kemesa kijüthou gei votuo, sidi a kecha kiu nunu uko bu uko neituo; uko kethe ruosuoko mu uko ruothoko a ruosuobau geinu lielietuo; kekreilamonyü themia pete la, a kiu pie kechaki üdi kietuo.

⁸Israel whuowaketako pfhü kenguyakecü, Niepuu, Ukepenuopfüe hakemhie puya, a tsie kengulieketako zomoü kekreimia rei ze vor uko ki shütuo.[56]

⁹Nie nhachü pete, nie ketsa nu ketuo nhachü pete, mezulieketuo la vorlie!

¹⁰Israel kepfheko u mhicie, uko pete u kesikele jü; uko reyakemo tefü keliehuo, süla relie si mo; u mho pema, zhü rühi, zekezhü u nei.

¹¹Tefüko u mevi kemerie; uko kepevü siya mo. Kuopfheko puocapuola sikelie rei jü; uko pete cha u tse vate, uko thuo u zhazhü le phre, mia peteko.

¹²Ukoe hai baya; “Vorlie, khubezu pfhülie khe; úko zu kekuopie u tshulie khe. Sodu rei thie mhietuo, zhapie mejükelie pfü mo” iya.