Read Angami Naga Isaya 57 Bible Online

Isaya 57 - Angami Naga bible

Isaya 57

¹Kemezhüu kaüjütaya, mu miapuorei süu pie puo nou shüse baya mo; nanyü nu kepecümia ze tuotaya, sirei miapuorei puocapuola silieya mo. Kepeka nunu kemiathomia ze tuotayacü la.

²Mu uko nouneu nu letaya; kemezhü cha nu ketuomia u zhü geinu rüleilieya.

³Derei nie we, haki vorlie, nie themoupfü nuonuoko, nie pieü mu thethenupfü nuoyieko.[57]

⁴Nie supuo se kethekre ba ga? No supuo petsou di mekuo kemeyapie mu n meü kerütha se ba ga? Niekoe kejokemoukechü, mu mhakese nuosenuoyieko ze,

⁵nie phrieboko donu mu seibo kepejoko khronu mia ze mha kesuo chü kebako; razhako nu mu tsiepfüko nu nie nuonuo dukhriyakecüko moü me?

⁶N yau sü razha nu ketsie kemejuko donu ba; süko, sükosü n ya zo; no kekrie ruosuoko rupie uko tsü, no thoulha ruosuo se vor, mha hako pie a nei chülietuo me?

⁷Kijüthou rükrie mu zhakecü puo gei no n zhü chülie mu no sünu ruosuo khashütuoü di kho.

⁸No n zasiu khapie kikha mu kikhaco-u sietsa shüwate; kekreilamonyü no a khawa di, no n zhü hielie, no süu gei sielie, no süu chü kemeyalie, mu no n thuo n la süko ze kepfhekholie, no uko zhü ngu n nei, sidi uko kemethuo meho terüta.

⁹No tier se di Molek nu rüve vo, mu mhare keviko chü pekra selie; no dieliemia ketsepie kepecie nu shü, mu ketsepie Sheol ketso rei tsu.

¹⁰No rühou pecha phikecü la mezieta, derei noe, “Süu kemethuo zo” isi mo. No n kekuo kesa ngu lalie, süla no phisiata molie.

¹¹No supuo merie mu prei di cürü, sidi a rükra mo morei a le rei shü mota ga? A kemekrie zei-i mu mhimieta di n bu a prei mota moü me?

¹²A n kemiatho mu n thoko dze pushütuo, derei süko n khruohilie lho.

¹³No meliekeshü ki, no terhuorhi kengu se kebako bu n kelaliecie! Teikhrie thuo uko toupietatuo, thesü thuo uko pie tatatuo. Derei kehoupuorei a rüzhükelieu kijü pie puo vie chütuo, mu a kijüthou kemesau welietuo.

¹⁴Siro hamhiei di putuo, “Chüshülie, chüshülie, chau keselie, a themiako cha nunu cakha pete biewalie” ituo.

¹⁵Rükrie mu zha di telhekechachie bayakecüu, Kemesa pie puo za kechüu hakemhie puya: Ae thechü kerükrie mu kemesa nu baya, mu u noumezhie mu u nou rünuokecümia rei ze baya, u nou kerünuomia nou chü perhei lashütuoü, mu u nou kemezhiekecümia nou chü perhei lashüketuo la.

¹⁶A kechachie keperhie zo tuolie lho, morei a nei mo rei zo tuolie lhocü la; a kinu ruopfüu paryacü la, mu a thuo themia ruopfü rei chüshü.

¹⁷Uko mha kemehou kejo-u la a nei mota; a uko vüshü, a zie kevielie di a nei mota; derei ukoe u thuo u chau nu tsiesie vota.

¹⁸A uko zhoko ngushü, derei a uko chü keshürhoshütuo; a uko chathatuo mu thenoukeluo pie uko tsü lashütuo, a tie siu chüpie thekrükechüko tsüshütuo.

¹⁹Nouneu, nouneu bu kepecie nu mu kepenuo nu rei baliecie, Jihovae siya; mu a uko chü keshürhoshütuo.

²⁰Derei kerüzhüko we dzükezha kerüpfhü tuoi tsesei balie kelho mhie zotuo; puo dzüko nyoba mu kerhu kelhoushüya.

²¹Ukepenuopfü puya, kelhiemia la we noune jü zo.