Read Angami Naga Isaya 59 Bible Online

Isaya 59 - Angami Naga bible

Isaya 59

¹Harie, Jihova dzie dzüta di mia kelalie kenjüta mo, morei puo nyie rüvü di mia pfhe si moketa chü mo.

²Derei nie kejokemouko thuo nie mu nie Kepenuopfü donu cakha puo chüte, mu nie kephouma bu nie geinu puo zie yawa di puo bu nie pfhe si mote.

³Thezie bu nie dzieko perhuwate, mu nie dziekinuoko gei kejokemou baketa la; nie tie-e kemeda pu, nie meüe kerüzhü pu mebe baya.

⁴Miapuorei puotoukecüu se vorya mo, miapuorei dietho di thezho-u pfhü voya mo; ukoe kemethuo mezhü peleya, uko cürüya, kelhie nuonipfülie di kejo penuoshüya.

⁵Ukoe prielepfü dzü koshüya, ukoe shürotsa doya; uko dzü kecü kehoupuorei siataya, mu puo biephroshü ro nyhübvü nuo puo parya.

⁶Uko bu shürotsa pfheko se pfhedzie chülie lho; uko chükelie vieko pie uko thuo uko whelie lho. Uko mhathoko sü kejokemou mhatho, mu uko dzie nu zhosuo thoko ba.

⁷Uko phi ta kesuo nu voya, mu ukoe jokemo zie pekrutuoü rhürhü voya; uko nouleko kejo noule zo, mha vakecü mu pekakecü uko chaüko nu ba.

⁸Ukoe kezekevi chau siya mo, mu uko cha nu kethoca tuo mo. Ukoe uko chako chü kerüwiwate, süko nu kevoko miapuorei noune siya mo.

⁹Süla kethocau hie kinu pecie, mu kemezhüu hie tsolieya mo; hie kezie pfhe baya, derei harie! Sünu kezei baya; mu kemeva pfhe ba, derei hie kezei nu votaya.

¹⁰Hie mhiciemia tuoi sozha kese voya, hie u mhi kejümia tuoi kesekevuoya; hie khinhieluo gei teizei merükecü ki tuoi hie phi mesüya, hie-e u keshürheithoko donu kesiamia tuoi.

¹¹Hie pete thega tuoi ruoya; mekhru tuoi hie melo mu melozhüya. Hie kethocau pfhe ba, derei ngulieya mo; kelakelieu pfhe, derei süue hie kinu pecie phite.

¹²Hie kejokemou n mhodzüki kra phicü la, mu hie kephoumako thuo hie pejoya. Hie kejokemouko thuo hie ze tuo zo, mu hie kejoko si ba.

¹³Kejokemou kechüu, mu Jihova phramvükecü, tsiu u Ukepenuopfü siedzi kechü nu rüreiketa, keperhie mu kepetsoukecü die kepu, ketijü die u nou le mu pukecü.

¹⁴Kethocau kerei pesiewate, mu kemezhüu kepecie nu bate; kekreilamonyü ketho-e te phetsuo nu tsute, mu mezhükecü bu lerlie kenjüte.

¹⁵Ketho sü tuo mote, mu kesuo nunu parkecü kehoupuorei mia puo rü bataya. Jihova süu ngu, mu kethocau tuo moketa la süu puo nei mo.

¹⁶Puo miapuorei tuo moketa ngu, mu miapuorei thedonu mha kechü jüketa ngu puo ngo zo; süla puo thuo puo bou se kuokelie se vor puo tsü, mu puo kemiatho thuo puo memhipielie.

¹⁷Puoe kemezhü pie u merü keya chülie, mu puo tsü gei kelakelie tsüre puo pfülie; puoe khepu pie puo pfhedzie chülie, mu noupfhüu pie pfhe tuoi puo kezilie.

¹⁸Uko mhatho kheki sü chü, puo su la shütuo; puo kepetsouko noupfhü, puo ngumvüko gei zhakhra chüshütuo, dzükhie kijüko mu puoe zhakhra khashütuo.

¹⁹Süla ukoe kisietsa nu Jihova zau preituo mu niaki thukepar nunu puo zapuzayieu preituo; puoe Jihova teikhrie thuo whuokeshü rücü dzü kekru puo tuoi vorketuo la.

²⁰Siro puoe Rhakelieu chü Zion ki, mu Jakob nu u kejo nunu rüreikelieko ki vortuo; Jihova siya.

²¹Siro a la we haha a uko ze dietseidiekhokelieu, Jihovae siya; a ruopfü n gei kebau, mu a die pie n tie nu keshüko, n tie nunu, morei n nuonuoko tie nunu, morei n nuonuo nuonuoko tie nunu tuotalie lho, tsie yawinu mu kela ketso, Jihovae siya.