Read Angami Naga Isaya 6 Bible Online

Isaya 6 - Angami Naga bible

Isaya 6

¹Uzia kediu siaketa cie, a Niepuu kediba puo gei ba di ngu, rükrie mu zha; mu puo kewhepfheko rüsuokiu tshu.

²Puo mhogei serafko tha; puo puoshü sorourou; shü kenie pie puo zie ya, keniepie puo phi whe, mu kenie se pruo.

³Siro puoe puo kie di sie: “Mesa, mesa, Krodiko Jihova mesa; kijüu pete puo kesokezie thuo tshu” isi.

⁴Sitse kicie mvüdzeko meliekeshü pfhe si di rünieta, mu mikhu thuo kiu tshuta.

⁵Sitse ae sie: “A sü hieshiehieruo! A sü jüte, a sü themia u tie mesakemo kro puo donu bayakecü la; sirei a mhi-e kediu, krodiko Jihova nguwate!” sita.

⁶Sitse serafko puo rüsuoba geinu mibe pie mizhü ketu puo bepie pruo a ki vor.

⁷Sidi seraf-u süu se a me nyü di sie a ki; “Tsie hau n tie nyüwate, n kejo chü sete, mu n kephouma vashüwate” sita.

⁸Süsie a Niepuu pfhe hakemhie pucü si, “A bu supuo ketseshü ta, mu supuonie úko la vota?” si. Sitse ae sie, “A haki bawe, a ketseshücie!” sishü.

⁹Sitse puoe sie, “Vo di themia hako ki pushücie: Rünyü we rünyülie, derei le hie; meho we meholie, derei si hie.

¹⁰Themia hako melou bie kerüvowalie, mu uko nyie bie kerüvüwalie, mu uko mhi bie peciewalie, uko bu uko mhi pie ngulie kelho, mu uko nyie pie rünyülie kelho la, mu uko melou pie mha silie, mu rüreilie di uko chü keshürholie kelho la” sishü.

¹¹Sitse ae sie, “Kichiepuo ta, he-i Jihova?” sishü. Sitse puoe sie; “Nadiko kaüjü vo themia lhou mota, mu kiko nu themia tuo mota, mu kijüu methuota kemochie,

¹²mu Jihova kehoupuorei ketsepie kepetse nu shüwa, tsiu kijüu nu thechü vakewa kra phita kemochie.

¹³Mhanuü sünu ker za puo baluo rei, süu rei the lawatuo, terebintbo morei phriebo wikewa sie puomie keba mhie thewatuo” sishü. Puo mvüu kemesa tsiau zo.